Jowai: Ka West Jaiñtia District Badminton Association, haka 7 tarik u uni u bnai da saam Jersey ko cha kiwa yalehke yong ka ki wow lai ya chimbynta haka 35th State Badminton Championship kamjooh leh da e ya ki i kyntien eh bok eh nasib.
Kani ka State Badminton Championship u sdang ko haka 9 tarik uni u bnai ha Shillong.
Chwa u saam ya ki Jersey da em chwa ka yalang tbian wa pyllai da u Vice President ka seiñ ha Khimmusniang Indoor Sport Hall Jowai, wei da yoh leh i klam e mynsiem na u General Secretary yong ka u H. Nongpluh na u W.Dkhar wa kiwi ki dkhot, heiwa da kyntu ki ya ki wa chim bynta u man ki kiwa em akor wei u kreh chitom ki yow yoh ki u rah naam ya ka Association kamjooh ka District hi waroh kawi.
Ha kani ka kynti ka WJDBA yooluti ko u rap yoh boon ki khusnaam neibhah rap kreh chitom ki bar haki snem wa dadep.
Ki khynnah wow lai yachim bynta na ka West Jaiñtia toh, haka under 13 boys kynthup ki ya u Sambul Lamare, Samehi Shylla, Armanroi Bamon, Dayang Lamar, Darap Shngain Challam, Heiwansa Passah, Ritreoo Dame Nongpluh, u Ardakune Dkhar katwa haka under 13 girls ka Josefina Passah.
Haka under 15 boys u Gregoreo Passah, Deilangwaoo Nongpluh, Rapki Chyrmang, Armankiru Laloo. Haka under 17 boys u Hrisami Passah, Buromlangki Lakiang, Rishanmioo Bamon, katwa haka under 19 boys u Hrisami Passah.
Haka senior men kynthup ya u Mebanker Shullai, Rimilan Passah, Peterson Lamare, Daymeniv Shullai wa u Arkioo Passah. Haka kyrdan Senior Women da mih ka Wandaka Passah.
Natlor kini ki wa yachim bynta kynthup ki leh ya u Coach u Sawanoohi Shullai, u Asst. Coach u Nangebormi Suting wa u Manager u Stephanson Blah.
Discussion about this post