Jowai: Ka Jingiaseng Kynthei KJP Synod Mihngi ynne ka sngi da e sñiawbha ko kamjooh da pynkyntang ko ya ki ar tylli ki kor sumaar wa chong dor T. 9,91,100 ki wow yarap hawa pooid bru wa tip kam ka Laparoscopic Surgery kawa da sdang hapoh ka Dr. Norman Tunnel Hospital, Jowia ha u snem 2016.
Ka Dr. D. Nongpluh kawa man leh kam ka Medical Superintendent kani ka Hospital da pynsñiaw ko yei sñiawngooh yong ka ya ka Jingiaseng Kynthei yeiwa wa ye ki u pynmih ya ka poisa, wei nyngkong da thmu u thied ya ka kor Vessel Sealing Electrocautery Unit wa chong dor kamwa T. 7.95 Lak wei ya ka Electronic Morsellator Unit wa chong dor kamwa T. 1.6 Lak daw thied da ka Hospital tangwa neiliang ka Jingiaseng Kynthai won ym e laad ki wei da thied ki ya pyn ar kini ki tiar.
Neiliang u Rev. F.M. Gympad, Executive Secretary, I/C JK KJP Synod Mihngi da ong u wa ka Jingiaseng Kynthai kreh ko neibynta kiwa boon jait nadooh ka puræ puthi hadooh u yarap ya kiwa dooh wa duk hadooh ka chiat ka khiah, kamtæ ynne ka sngi man ko kam chibynta ki thong wa kreh yong ka.
Ka M.B. Jyrwa, Chairperson, Jingiaseng Kynthei KJP Synod Mihngi da ong ko wa ha Delhi leh yaroh bha ki ya ki Hospital wa seiñ da ka niam neibhah ki yarap ki ya kiwa dooh wa duk ki wym yoh u lai cha ki Hospital wa syad.
U Dr. S. Sangma uwa pynemkaam ya kini ki tiar da ong u wa ka company wa thied ki toh kawa bha tam wei lada lai cha kiwi ki Hospital wa pawnaam daw chem ya ki jooh ki tiar. Da ong u leh wa kini ki tiar daw yarap ki ym du ya oo kamjooh leh ya kiwa chitom wei da e nong muna wa heipor wa pooid yow sai ya ka muna khon nachwa hap pooid deiwa ah deiwa heh i kha tangwa kani ka kor won siam thlu ko iwa khian wei ye ko u sai ya ka muna khon deiwa ah ka lyngkhot yow mih ko na i thlu wa khian.
Kiwa chah sumaar leh ye ki u mih na Hospital du hadein wa chi sngi lada nujor wa nachwa iwa chim por chi tayaw yow looit kse pooid.
Discussion about this post