Na ki 200 ngut kiwa yoh myntoi hapoh ka jylla, 12 ngut kiwa na East Khasi Hills District da yoh ki ya ka UDID Disability Certificate wa ki tiar yarap (Assistive Devices) ha ka yalang wa pynman ynne ka sngi kam chibynta ka sngi kyrpang ki bru wa em hei duna hei doh i pran namo ka International Day for Persons with Disabilities deiwa pynman lang leh ya ka North East Disability Summit 2021, ha Shillong Club, Shillong.
Kam chibynta wow pynkrehkaam ya ka Healthy India Chronicle, kini ki tiar yarap da e sñiawbha da ka All-India Council for Technical Education (AICTE) waka Ministry of Labour and Employment deilang waka Ministry of Skill Development, ka sorkar India.
Neiliang u Kyrmen Shylla, u Montri ka Social Welfare da wan embyntalang u kam u kongsan.
Ka phang kani ka yalang wa pynman da ka yung krehkaam u Commissioner for Persons with Disabilities, ka sorkar Meghalaya deiwa ya krehlang waka State Resource Centre on Disability Affairs, Civil Hospital waka Healthy India Chronicle, New Delhi toh ‘Leadership and Participation of Persons with Disabilities toward an inclusive, accessible and sustainable post COVID-19 world’.
Ka thong ini toh yow pynsñiawthooh yei hok wa i man chngaaiñ ki bru wa em i tymbuiñ i duna ha waroh ki liang yow ye ki wow chimbynta kamjooh wow wailaad ya ki.
Hawa e yei klam, u Kyrmen Shylla da ong u wa waroh kawi ka pyrthai toh da pynkhyrngiat wei da pynsñiawthooh yei eh i khoo wa da maad da kiwa em i duna wei da yaleh wow yada ya ki yow ye ki wow ya chimbynta lang ha waroh ki jait kaam. Da yaroh u leh yei kyrchaan ya ka AICTE deiwa ong wa ki tiar wow yarap wa da e cha ki daw yarap bha i hei wow ye ki wow sai yei sap i phong yong ki.
Da khana u leh wa ka sorkar lyngba ka chnat Social Welfare da pynkrehkaam ki ya kiwa boon ki Scheme yow myntoi kiwa duna hei doh i pran deiwa ban joor yei emkaam wow yoh wei wow pynthymme ya ki UDID Card yow yoh ki ya kini ki myntoi. Chooh chooh da kdaw u yei sdang ya ka Composite Regional Centre ha Shillong deiwa ya krehlang waka National Institute for the Empowerment of People with Multiple Disabilities, da khana leh wa i thaw wa heh 50 Acre da dep wow jied yow booh ya ka Centre for Disability Sports ha Umsawli, heiwa na ini, 10 Acre da booh neibynta ka Composite Regional Centre.
Neiliang u G.H.P. Raju, Principal Secretary, Labour Department da pyntip u wa 44,000 ngut ki bru wa em ya kiwa boon ki jait i duna hei doh i pran da dep tipmit wei da em pyrtuid ki wa ka sorkar. Da ban joor u leh yei emkaam wow pynlang pynlum ka yutip yong ki bru wa em i duna hei doh i pran hapoh ka jylla, deiwa ong leh wa emkaam wow em ki ya u Jan Dhan Yojana, Aadhaar wa u Mobile Number yow yoh ki ya ka poisa yarap kawa lai bait cha ka Bank Account yong ki lyngba ki Scheme sorkar.
Da pynsñiaw u leh yei sñiawsih wa em ki kattu katni ki Scheme sorkar wa da mylliñ ki wow kynthup lang ya kitu kiwa em i duna hei bor i doh i pran, kamtæ da ong u wa emkaam wow booh bhah ka poisa, u pynku yei pynduna namo ka Subsidy wa i booh kyrpang ki kreh (Job Reservation) neibynta kitu kiwa duna hei doh i pran yow ye u taan lang wa ki hapoh ki kaam pynroi ka sorkar.
U kongsan da pynlait u leh ya ka kot Souvenir ka Health India Chronicle kawa da khana ya kiwa boon ki Scheme wa ki laad yarap lyngba ki chnat sorkar neibynta kiwa em hei duna i doh i pran.
