Ka Jaiñtia Students’ Movement (JSM) Western region da yoh laad biang ko u saam khoo cha ki manyung wa dooh wa duk kiwa kynthup haka chnong Morap wa ha Mustem West Jaiñtia Hills District.
Ha ka tai ka sngi neiliang kiwa yahkhmat ka JSM Morap Unit da yoh ki wow saam katwa ye i bor cha ki kattu katni ki manyung happoh ka chnong Morap wei ya uni u khoo da saam da u President ka Unit deilang ki dkhot yong ka kamjooh.
Ha i saam kho won ha Mustem da leh daka Jowai Circle hei yahkhmat u Sebastian Sapooh, Organising Secretary ka JSM (WR), u Boyme Myrphet naka Jowai Circle, u Chancellor Talang GS (WR) deilang wa kiwi ki dkhot. Ha Mustem da pynman leh yaka yalang chwa u saam wei da yoh yei klam na u Thywill Dkhar uwa man u dkhot ka chnong Mustem, wa na ki kattu katni ki dkhot wa emlang chirup waka seiñ.
Neiliang ki dkhot ka chnong da e khublei wa i sñiawngooh ki cha kiwa yahkhmat ka JSM Western Region, Jowai Circle wa da chynna ki ya kiwa dooh wa duk han laman i e yarap wa kajiak, wei neiliang ki dkhot ka chnong da kitbok kitrwiang ki ya kiwa yahkhmat ka seiñ hi waroh kawi yow ye chooh chooh ki wow e yarap cha kiwi tawan ki chnong neni chakhmat.
Neiliang kiwa yahkhmat ka JSM (WR) da pyntip ki wa daw pteiñ chooh chooh ki neni chakhmat wow yarap katwa ye i bor ki khamtam kam heni i por wa kyrdooh wa chem jynjar ki paidbah ka thaaiñ, ong ka Wyrta na u Boyme Myrphet, Vice President Jowai Circle.
