Jowai: U MDC ka Jowai South Constituency, u Saron Pasweth ynne ka sngi da pynlait u ya u khoo neibynta u saam chaki paidbah deiwa e kti lyngba ki Waheh Chnong yong ki chnong waphær waphær kiwa em hapoh ka Constituency yong oo.
Ya uni u khoo da e bor haki waheh chong wow pynlai katkam i yoobiang yong ki haki chnong.
Chwa wow saam ya u khoo da yoh i klam tbian na u Saron Pasweth waki Waheh Chnong wada wan chim khoo ha kani ka sngi.
Neiliang ki Waheh Chnong da pynsñiaw ki yei mynsien wa kmen wa yoh yarap ha kam ini i por wa emkaam dooh ki paaid wa chong chnong. Da e ki leh yei kyrkhu kyrdoh ya u MDC yow nang ye chooh chooh u wow kreh neibynta ki kaam wa bha hapoh ka Constituency kamjooh ka ri Jaiñtia hi waroh kawi.
U Saron Pasweth da kyntu u wa katwa ye wa lah toh u pynyoh ya u khoo cha kiwa chong chnong wa maad yei jynjar, khlem da ñiaw chilliang ya ki bru wa thap na oo næ ki wym em.
Ong u wa ymye u pyndap ya waroh ki khon ki chnong waphær waphær dei wow e khoo ha chi lynter ka Lockdown, tangwa kani man ko chibynta wow pyndap yei duna tymbuiñ yong ki. Han kattæ leh ong u wa i mynsien kwah i wow pynbiang ya waroh ki khon ka Constituency neipor cheipor.
Kyntu haroh u ya waroh ki Waheh Chnong wow pdiang yeini i e yong oo dei mynsien wa kyllooid han laman iwa khian leh.
Heijooh i por chim u ka kabu wow kyntu haroh ya uwi pa uwi uwa chong chnong hapoh ka Constituency, lyngba ki Waheh Chnong yow bood ryntih yaki aiñ wa da e ka Health Department hei yatoh wow yaleh pyrchah ya u COVID-19.
Discussion about this post