Haka yalang wow ya saam kylliang yei buit wa pynjop yei khih i khan kawa tip kam ka “Knowledge Sharing Event of Best Practices” wada pynman daka District Project Management Unit, East Jaiñtia Hills District wa haap hapoh ka Meghalaya Basin Management Agency, ki bru samen, kiwa yahkhmat yong ki chnong kamjooh ki Self Help Group kiwa da ye u jop næ lai bha chakhmat heiyatoh i kaam waphær waphær wa leh ki da chim ki ka laad u khana næ saam yei buit wa lai luti ki heiyatoh ki kaam wa leh ki haka yalang wada pynman ha Khliehriat West Community Hall ynnin ka sngi.
Najrong ki sahep naki chnat krehkaam waphær waphær da emlang leh ki paidbah kiwa da ap da sñiaw yei lailuti kini ki bru la heiyatoh i kaam rep, i psan i ri mrad, i thung syntu wa kiwi wa da ye bha ki u lai chakhmat deiwa yoh leh i yarap naka sorkar hei rukom waphær waphær.
Ki 10 tylli nadooh ki chnong, ki SHG kiwa da yoh yei naam wa ye u lehbha yei kaam wa kreh ki hapoh ka East Jaiñtia Hills District kynthup ki ya ka chnong Ïongkaluh kawa da ye u pynneh pynsah yaka Thwai Thlen najrong wa chna yaka Check Dam waka liar pynkai um cha ki thaw rep deilang i yarap ka MeghaLAMP.
Neitæ ka chnong Jalyiah IVCS wada Register haka 04-02-21 wei da em ko 360 ngut ki dkhot hadooh u Naisan 2022, da ye ko u smat ku i e chakri cha ka 345 yung naka 527 tylli wa em ki manyung. Ki kaam wa hakhmat yong ka toh i kynchew poisa wei pynlai pynwan yaka poisa heiwa ka poisa wada yoh kynchew hadooh ynne ka sngi toh kamwa T. 21,25,000 katwa T. 6,22,000 da e ram.
Ka Shankylliang Producer Group ka kynhun wa ye u lai chakhmat heiyatoh i sap thaiñ wei da jooh chimbynta ko leh u li dai ya ki mar haki SHG Mela kamjooh haka International Buyers Sellers ha Shillong.
Ka chnong Mukhaialong hajrong i ye ko u pynmiat biang yaka wah Moolaber kawa da chah ktah boon snem ha i bih mooyong, heiwa katni won da e myntoi bha ko ya ki paidbah ka chnong.
Ka chnong Moolamylliang hajrong i ye ko u pynneh pynsah yei yirngam ka chnong ka thaw deiwa thung dieñ thung syntu, heijooh i por u wanrah yei khooid i jngiar chirup i yarap wa yoh naka sorkar.
U Sunshine Ryngkhlem na Wapung Skur toh uwa da ye u lai chakhmat heiyatoh i ri sniang, ka Iahphang Dkhar na Tuber Shohshrieh heiyatoh i rep soh Strawberry wot hadooh wa da ye ko leh u pynmih yei umsoh.
U Marius Tlang naka chnong Umrasong uwa ri sniang kamjooh wei rep satrooiñ, u Serious Dkhar na Ladwah Wapung uwa da pawnaam hei thung syntu wei chna pynwandur leh yaki syntu katkam i emkaam ki bru la hei yap i saa næ i lehkmen sñiawbha.
Katwa ka Kyrsiew Ryngkhlem na Wapung Skur kam ka dkhot ka SHG wa PG kawa da bna naam hei wow pynmih yei sboh wa chna da ka hi.
Neiliang u kongsan yong kani ka sngi, u Abhilash Baranwal IAS, Deputy Commissioner East Jaiñtia Hills District, hawa e yei klam ong u, ka sorkar jylla yaleh bha ko u pynku yei stat i tip tangwa tip bait i wym ye u yoh kreh sorkar waroh, neitæ i daw emkaam u saam yei buit wa chem i yow ye u pynlai bait yei won iwon i kaam wa leh wei ku chaphrang.
Da ban joor haroh u hajrong i emkaam wow mih chakhmat yow kyrchaan yaka jylla neibhah kamwa man katni boon hi chaniah i na baar bait wot iwa ye u leh da i hi leh heiyatoh u pynmih ki doh ki jhoor wa kiwi. Da kyntu u leh wow chim kabu yaki laad yarap wa yoh naka sorkar.
Kamtæ yooluti u wa dei yakrehlang ki sahep wa ki paidbah, ka District u nangku chooh chooh ko.
Ha kani ka sngi da yoh leh i klam na u Hunlang Blah DPM, i pynkup burom cha kini kiwa ye u leh bha wei lai chakhmat yei kaam wa leh ki, kamjooh i yachem yumut hapyrdi ki sahep sorkar wa ki paidbah wa kini kiwa ye u lai chakhmat hei kaam.
