Ki pulit ka 6th MLP BN kiwa em ha waroh ki kyrdan, da rai ki wow noh kyllooid cha kiwa dooh wa duk kiwa emkaam yei yarap khamtam kitu kiwa da chah ktah nei em ka khlam COVID-19, deiwa e yarap leh cha ki thaw ri khynnah kamjooh cha ki bru kiwa da chem chitom sakhiat.
Khamtam ha ini i por wa da jan poi ka Christmas deiwa pyrkhat leh yei chah ktah ka kamai ka kajih neidaw ka khlam, da e sñiawbha leh da ki kymmor.
Kamtæ ynnin ka 1 tarik, ka 6th MLP BN da sdang ko ya thnong (Campaign) kawa tip kam ka “Reaching Out-Beyond The Call of Duty.”
Ha katai ka sngi da e sñiawbha da 50 tylli ki kymmor cha kiwa emkaam yarap ka chanong Umran Niangbyrnai cha ki bru wa da jied daka dorbar chnong.
Ya ini daw pteiñ leh ha kini ki sngi wow wan daka 6th MLP BN Hq. Umran wei daw saam mar 50 tylli ki kymmor cha ki chnong wa em cha jan cha ki bru wa jied da ki VDP waka Dorbar Chnong.
Haddooh kattæ kiwa da e yarap cha kani ka thong da kynthup ko nadooh ki para pulit hadooh na kiwi leh wei da yoh 500 tylli ki kymmor kiwa daw lai saam chwa u poi ka Christmas.
Neiliang ki pulit da yooluti ki wa kiwi leh daw wan e yarap ki heiwa hadooh ynne ka 2 tarik da em sa 400 tylli ki kymmor kiwa da kular wow pynyoh da ki pulit kamjooh na kiwi ki bru iwa daw pynpoi 900 tylli ki kymmor.
Kamtæ da pynsñiaw leh yei sñiawngooh ya ki pulit, ka DC ka Ri-Bhoi kamjooh ya waroh kiwa da e sñiawbha.
