Jowai: Ka Jaiñtia Hills Cement Manufacturing Association (JHCMA) kawa kynthup ya 8 tylli ki kharkhana pynmih khyndaw-bilat, ynnin ka sngi chirup i yakrehlang wa ka Dorbar Chnong Madankynsaw Mookyndeng West Jaiñtia Hills da ye ko u e yarap da ki kymmor chaki 100 tylli ki manyung ka chnong.
Haka yalang wa tbian wada pynman ha Babu Cyril Community Hall, neiliang ka Jaiñtia Hills Cement Manufacturing Association da wan mihkhmat da u P.K. Joshi, Vice President Green Valley Industries Limited, heijooh i por uwa man leh kam u General Secretary ka JHCMA.
U P.K. Joshi hawa e yei klam pynsñiaw u yei kmen wow poi ha kani ka chnong kawa da angnood u wow wan da slem, wei ong u ini i e yarap yong ki man i iwa khian wa da pyrchang ki kat i bor wa ye, nalor wa dap ki leh dei kmen wow yoh kam kani ka laad u yarap para bru.
Yaroh u leh ya kiwa chong chnong kamjooh kiwa pynlai chnong hajrong i ye yong ki wow pynman yaka chnong kawa khooid wa jngiar, kamjooh leh wa dei ya chimkhia yonglang hadooh kattæ dang lait ki na u COVID-19.
Da pynrap haroh u wa ka yaw ka haat leh da hiar ko khamtam nawa em kani ka khlam, heiwa em i por pynpyrkhat ko ya ki wow randien. Hanla kattæ leh ong u iwa emkaam hi toh u sikai ya idæ kammon u im.
U Arkijuh Dkhar won yooluti u wa kamwa kani ka chnong man ko kawa dang lait naka khlam, neini chaphrang leh u nang ye chooh chooh ki u yakhun deiwa bood ya ki kyndon, wei u Blai leh u emlang bait u chirup neibynta kiwon kiwon ki kaam wa bha wa ki angnood ki.
Neiliang ka chnong Madankynsaw Mookyndeng leh lyngba u waheh chnong u Danny Shadap, u Asst. General Secretary u Rimanki Chympa waka B.S. Magles Suchiang Executive Member ka chnong, da e khublei ki ya kani ka Company hajrong i leh sbun yong ki u wan e yarap, wei ngait skem ki wa ini daw ye chooh chooh u pteiñ yei kaam wa bha.
Heijooh i por yooluti ki wa neini chaphrang leh u nang ye chooh chooh ki u e yarap yaka chnong rap boon chah.
