Ynne ka 4 tarik kam chibynta wow pteiñ yei e yarap cha ka imlang sahlang hapoh ka thong “Reaching Out-Beyond the Call of Duty” da ki pulit ka 6th MLP BN, da pynman yei saam kymmor ha ka chnong Umran, Ri Bhoi deiwa chimbynta lang u Rangbah Shnong u Lambor Mukhim Bina, u Secretary chnong wa kiwi ki dkhot ka chnong.
Ha chwa ini, da dep leh wow saam kymmor cha ki le tylli ki chnong nadooh ka 1 tarik uni u bnai da ki pulit, neiliang ka chnong Umran leh da rai ki wow saam 100 tylli ki kymmor wa pynbiang da ka chnong cha ki kynthai katwa ki pulit ka 6th MLP BN da e sñiawbha ki 50 tylli cha ki chynrang ka chnong.
Uwi u khynnah ka chnong uwa tip pyrtuid kam u Alden Kurbah kam ka dak wow pynyoo yei burom yaki pulit da riam u leh da ki sula pulit ki yong oo hi.
Kam ka dak wow pynyoo yei burom ya kitu kiwa em hakhmat dooh wow leh pyrchah yaka khlam, da pynkup burom leh ya ki 5 ngut ki wakreh Anganwadi wa ki Asha kiwa kreh hapoh ka chnong.
Neidaw ka chnong Umran man ko ka chnong wa heh kawa da em leh 3 tylli ki Block wei da em leh 400 tylli ki manyung, da e sa 20 tylli ki kymmor cha ka dorbar chnong yow saam ko cha ki chynrang ka chnong kiwa emkaam kymmor.
Da yoh leh yei klam wa tbian na u Rangbah Shnong wa na u Secretary ka chnong katwa neibynta ka 6th MLP BN da klam da u R. Rapsang, Head Assistant ka yung krehkaam u Commandant ka 6th MLP BN.
