Ka Myntdu Pynthorneiñ Farmers & Producer Organisation (MPFPO) man ko ka seiñ yong ki warep kba, rep jhoor, ri mrad wa ki tre hali ha Myntdu Pynthorneiñ, kamtæ ynne ka sngi da pynman biang ki yei saam kba kamwa 170 Kg u jait CAU R-1.
Ya uni u symbe kba ki warep da yoh ki hadien ka e sikai na u Prof. N.B. Singh uwa naka College P.G&A.S. Umiam Ri Bhoi District kawa man ka chnat ka CAU Imphal wei wa da rep ya uni u symbe kba ha Myntdu Pynthorneiñ wa ha chnong Mukhla nadooh u snem wa da dep. Da man u u kba wa miat hadooh kattæ kattæ ha kini ki thaw hanlada ha u snem wa dep da cha pynsih u ha i chlai um waka la-ær, tangwa i mih yong uni u kba man i iwa yoh nong bha ya ki warep.
Ha chwa u saam ya uni u symbe kba, da yoh i klam na u K.L. Pariat uwa wan wow e bor e mynsien wei wow yahluti ya ka seiñ. Da ong u wa ki warep toh kiwa pynim ya ka beirymaw wa ka tawiar ya i. Ha ka khlam COVID-19 ynnin u snem 2020, ki warep man ki kiwa kyrchaan ya kiwa chong chnong ha kani ka ri Jaiñtia yong i. Kamtæ kyrsu kyntu u ya ki warep yow man ki kiwa ya sñiawthooh yumut wei kiwa ya ryntih, kamjooh leh da kyrpaad joor u ya ki khon ki warep, kiwa da em hei puræ puthi wow sñiawbha u ya mih chakhmat u ya chimbynta ha i kaam rep, khnang wa ki Scheme waphær waphær ki warep na ki chnat sorkar Meghalaya lane na ka sorkar India wow ye u krehkaam ki cha ki hali ki pynthor kba yong i, yow im ki warep dei pahooh pahaiñ, yow nang ye chooh chooh u pynmih ya u khoo u jhoor, i doh i keh, ka umdih umbaam na kini ki loom ki pdeiñ ki yong i wa kiwa chong chnong u chngaaiñ u im ki ha kini ki loom wa ka ri India ka yong i.
Ya u ni u symbe kba da saam da u Snaiwbha Shylla uwa na ka chnong Khliehtyrchi uwa man u warep kamjooh leh u tre hali ha Myntdu Pynthorneiñ, u Pyntngen Kyndait, General Secretary, u Sihon Dkhar, Vice President wa u Mehi Phawa, Asstt. General Secretary yong ka seiñ, cha ki 35 ngut ki warep kiwa na chnong Khliehtyrchi, na chnong Mihmyntdu ki warep ha Myntdu Pynthorneiñ wa cha ki warep ha Mukhla wa ki warep ha Myntdu Pynthorwah, Jowai.
Neiliang yong ka seiñ kyrmen bha ko wa uni u symbe kba CAU R-1 u bha u soh bha u ha uni u snem, yow yoh ka seiñ u saam cha ki warep ya uni u symbe bnai CAU R-1 sa ha u bnai Wisu 2022.
