Ki dkhot ka Indian Red Cross Society, West Jaiñtia Hills Unit kam chibynta ka thong krehkaam wow lai e yarap “Distribution of Humanitarian Aid” ha ka sngi Khyllaw 20 tarik Khonchonglad da hiar ki ha chnong Shilliangmyntang, ha ka sngi Mulong 22 tarik ha Mihmyntdu, ha ka sngi Pyngkat 25 tarik ha chnong Ialong wa ha ka sngi Thymblein 26 tarik won ha chnong Amlarem.
Heini i li yoohkjat ki dkhot ka Indian Red Cross Society, West Jaiñtia Hills Unit cha kini ki chnong da saam ki ya ki tiar cha ki khynnah puræ ka Shilliangmyntang Secondary School, Laskein Block, Mihmyntdu Secondary School, ha Modern Secondary School Ialong, Thadlaskein Block wa ha Amlarem Govt. L.P. School.
Ha ki yalang yahkhmat waphær chwa wow ekti ya ki tiar cha ki khynnah puræ yong ki le tylli ki skur, neiliang ki bor pait bor pynlai yong kini ki skur hei e kyntien da pynsñiaw wa dap ki dei sñiawngooh wa khroo ya ki bor pait bor pynlai ka Indian Red Cross Society, West Jaiñtia Hills kiwa daleh yei wabha tam neibynta i myntoi ki khynnah.
Ki dkhot ka Indian Red Cross Society, West Jaiñtia Unit kiwa da ya embyntalang heini lisaam ya kini ki tiar cha man ki skur toh u Hanpaya Nongpluh, Life Member IRCS, ka Chwadaka Laloo, Life Member IRCS, u Hopeful Khongstia, Life Member IRCS wa u Ohiwot Laloo, Secretary IRCS West Jaiñtia Hills Unit.
