Kam chibynta wow kyntu kynrong ya ka puræ puthi lyngba i stat ka juk wa katni, neiliang ka yung krehkaam u Block Development Officer, Mairang C&RD Block ha ka 4 tarik da saam ki ya ki M-Tab hapoh ka Chief Minister’s Digital Learning Aid Scheme cha ki khynnah Class XI yong u snem 2022-2023 ya kawa da pynman ha St. Thomas Higher Secondary School, Mairang heiwa u Metbah Lyngdoh uwa man u Chairman yong ka Meghalaya State Planning Board wei kamjooh u MLA ka thaaiñ da lai embynta u kam u kongsan deiwa synraan lang u Deputy Commissioner ka Eastern West Khasi Hills District, u G. Kharmawphlang kam u symbood kongsan.
U Metbah hawa e yei klam da ong u wa ki khynnah man ki ka mynried ka imlang sahlang, kamtæ toh u man ki kiwa kreh minot wow ya ryngkat bor wa ki khynnah wa lai puræ ha kiwi won ki bynta yong ka pyrthai ha ka rukom pynemkaam ya ka stat Technology ha i puræ puthi kawa man-ka-sngi ka yong ki wei da kyntu leh ya waroh kiwa yoh ya kini ki M-Tab yow pynemkaam deiwa yoh myntoi ki kamjooh ya ka imlang sahlang.
Chooh chooh u Metbah da ong u wa kini ki M-Tab toh kiwa da e ka sorkar dei mynkna wei da klam u leh yei duna i yoh khih yoh kreh kawa man ka phang wa emkaam bha u yaklam wei yatai ha ka ri wa ka jylla wei da kyntu u leh ya waroh wym toh u yooluti ki du yei kaam sorkar tangwa wow thooh laad da kiwi ki rukom kamai ja-kpoh.
Neiliang u Deputy Commissioner da kyntu u ya ki khynnah kiwa da yoh ya kini ki M-Tab wow pynemkaam hok neibynta i puræ puthi yong ki.
Ha kani ka sngi da saam leh ya ki khusnaam cha kiwa jop ha ki yakob thoh poitri wei dro dur iwa man leh kam chibynta i lehkmen ya ka pynneh pynsah rym-aw yong uni u snem.
