U Reading War, uwa chong chnong ka Latyrke, East Jaiñtia Hills da paan RTI u naka Central Pollution Control Board (CPCB), Shillong heiyatoh waka poisa wa da phah napoh ka Meghalaya Environment Protection & Restoration Fund (MEPRF) yow pynim biang ya ki thaw wa da chah ktah nei tih mar pohkhyndaw kawa da poi T. 100 klur katkam ka hukum ka Supreme Court.
Hawa e yei jubab, ka CPCB da ong ko wa katkam ka hukum ka Supreme Court ka India ha u 2019, neiliang ka sorkar Meghalaya da phah ko T. 50 klur ha ka 02-08-19 wa T. 50 klur ha ka 03-08-19 cha ka Account ka CPCB.
Hawa kylli katwon wa da pynemkaam ya kani ka poisa wa T. 100 klur, da jubab wa ym pu em pynemkaam iyi iyi leh wei dang sah hi T. 100 klur kawa toh u pynemkaam.
Hawa kylli won ki kaam wa da pynkreh wei da dep mang poisa yow pynkhai im biang ha kiwa boon ki District ka jylla Meghalaya, da jubab wa ym pu em ki kreh wa da booh bhah ka poisa yow pynkreh hapoh ka jylla.
Hawa kylli won katwon tylli ki kreh wa da pyndep deiwa pynemkaam da kani ka poisa, da jubab wa ym pu em kiwa da pyndep ki kreh deiwa pynemkaam ya kani ka poisa.
Neiliang u Reading War da ong u wa ka CPCB khlem leh ko ya iwa da phah da ka Supreme Court deiwa ong wa lada pynemkaam ya ka T. 100 klur da ye wow pynim biang ya ki wah wa em ha East Jaiñtia Hills kam ka Moopun kawa man ka um wa pynemkaam ki 5 tylli ki chnong kitæ ka Jarain, Tluh, Latyrke, Moolamylliang wa Lamyrsiang wa kiwi ki chnong wa em hajan ka Elaka Sutnga kawa katni daw man noh ka wah kawa daw yap.
Chooh chooh da ong u wa ini pynyoo yeiwa tlot kani ka chnat sorkar wow bood ya iwa da phah da ka yung bichaar wa hakhlieh dooh ka ri.
