Kiwa dang em ya u COVID-19 hapoh ka Raj Bhavan ka jylla Meghalaya da hiar ki cha ka 15 ngut kiwa da jan waroh da dep leh ki yaka Quarantine wa 14 sngi wei da pynlait yaki deiwa e leh yaka Discharge Certificate yow leh won ki sa ka chong yung wa 7 sngi.
U Pravin Bakshi, IAS Secretary u Lat ka Meghalaya Raj Bhavan, Shillong da pyntip u wa kini waroh ym toh kiwa em ki dak ki chin wa chitom wei toh kiwa chait wa khlan. Da pyntip u leh wa yaka hukum Containment Zone yaka Raj Bhavan Quarters da pyndam haka 27 tarik u Naikhynde lait noh sa 4 tylli ki Micro Containment Area ki yung kiwa yoh COVID-19 kiwa chitom malu mala kiwa da Test biang wei kiwa dang em ya uni u khñiang.
Pravin Bakshi da pyntip u leh wa u Lat ka jylla u Satya Pal Malik kamjooh ki wakreh yajan wa oo da dep Test biang yaki wei da chem wa ym em de ki ya uni u khñiang. Chooh chooh ya u Lat da Test biang ya oo hadien wa liwan u na New Delhi haka 29 tarik u Naikhynde hadien wa yachem u wa u President ka India wa kiwi ki kaam yong oo nadooh ka 22 hadooh ka 28 tarik u Naikhynde wei da chem wa ym em chah ktah u ha u COVID-19.
U Bakshi da e khublei u leh yaka sorkar jylla, yaka Health Department, District Administration wa ki District Police yei yarap wei kyrchaan yong ki ha ini i por wa chem chitom.
Kamjooh da e khublei u ya u Montri Rangbah ya kiwa da pynbiang u heipor wa leh Quarantine ki manyung wa boon. Da e khublei u leh ya u Health Minister, u A L Hek yei chimkhia u wow pait ya waroh i jait heipor wa pynman Containment ha Raj Bhavan kamjooh ha kiwi ki por.
