Waroh chimiet da sahkut ki kari paidbah kamjooh kiwa kitbru wa chitom namo ki Ambulance kiwa lai wa wan ha Kongong, East Jaiñtia Hills ynnin i miet neidaw wa em i pynsahkut chynnam da kiwa khayi mooyong tooh kiwa katni da khut kam ki ‘High Level’.
Neiliang u Harvis Phawa wa ki kattu katni kiwa da sahkut kari da ong ki ini da ktah bha ko yei lai i wan yong ki paidbah khamtam ya ki Ambulance kiwa kit ya kiwa kjut wa chitom wow poi cha ki thaw sumaar. Da pyntip wa hawa pyrchang ki wow thooh yutip ya ini wa da pynsahkut kari chynnam da kitæ ki High Level kiwa khayi mooyong tooh. toh yow pynsahkut ya kiwi tawan kiwa haap hapoh ki High Level kiwa tip kam ki Low Level kiwa mut toh kiwa khian kyrdan.
Yow lait na ini i sahkut kari iwa waroh chimiet, ki kari paidbah hadooh ki Ambulance leh da hap ki wow lai na Bypass chadooh Shangpung, Mynska, Byrwai, Sohkymphor ter- ter chadooh Mukhep tang yow poi yung smat natlor wa jngai wei sih ka luti.
Da em leh ki kari wa hap wow lai na sarok 5 Chnong Pynthor Sale ter-ter yow mih chadooh Moolamanoh cha Rymbai Road, Ladrymbai.
Ini i rukom leh yong ki kattu katni ngut kiwa khayi mooyong tooh da ktah ko hadooh kattæ kattæ yei suk i lai i wan ki kari wa i yap i im yong ki paidbah waboon walang khamtam ya kiwa kjut wa chitom.
Kani da man sakhiat ko i chah yoohbeiñ ya uwa khian wa nai kamjooh leh ya kiwa wan na baar ka jylla lyngba uni u sarok kam na Mizoram, Assam, Manipur wa kiwi ki jylla kiwa hap lai lyngba na uni u sarok hadooh wa ki pulit wa pynlai kari leh da kulmar lut ki du neidaw wa rhah spah yong ki kattu katni ngut donhi iwa da ktah ko ya kiwa boon walang.
Ini waroh i pynbaad da lai ko cha ka sorkar namo cha ka High Level kawa man ka dhab (Group) yong kiwa khayi mooyong tooh kiwa kynthup lang yaki kattu katni ngut ki heh ki haaiñ. Da beiñ joor leh ya kam ini i leh embor, i pynthut ya i suk i saaiñ yong u paidbah waboon walang, pynkut ka kyrwoh na u Harvis Phawa chirup wa ki kattu katni ngut ki paidbah wa sahkut kari ha katai ka thaw.
