Kiwa yut na ri Ukraine wa kynthup ya ki nong India da sahkut ki ha u pood waka ri Poland neidaw wym chah ya ki wow psiah ki hadien wa da lai luti ki deiwa jngai yow poi cha uni u pood wei da mih leh i chah pynbaad wa chah lehbeiñ ha ki chipai manda poi ki ha i thaw psiah cha Poland.
Hadien wa mih iwi i Video wa da kam toh wa sdang siat ki chipai cha suiñ yow beh ya ki bru wa kynthup ya ki nong India kiwa lai puræ ha Ukraine, da wanrah yei beiñ na kiwa boon heiwa ki nong India kiwa na Kerala da paan yarap ki iwa da pynman ya u CM ka Kerala, u Pnarayi Vijayan wow thoh chithi cha u PM Narendra Modi.
Da em kiwa sahkut wa da yang hadooh 50 kynta wow psiah chapoh ka Poland hapyrdi i kjam wa joor.
Da em leh ki nong Africa kiwa da chah pynyang suloi manda poi ki ha ini i thaw wym chah u psiah ki.
Kiwa da yoh u psiah chwa chapoh Poland toh ki kynthai wa ki khynnah ka ri Ukraine heiwa ya kiwi ki chynrang da phah ya ki wow neh yow yaleh thma.
Kam wow pynkynmoo waka Embassy ka India da pyntip ko wa em bru ko wa yang ya ki nong India du ha u pood ka Ukraine wa Hungary wei da pynchlur ya ki wow wan cha uni u pood.
Ka sorkar pyntip hi ko wa ye hi wow lai cha Poland wa Slovakia tangwa ha kini ki thaw toh kiwa boon bha ki bru wa pyrchang u mih wei ym em bru ka India wa yang ya ki.
Da em leh nyngkong chwa kiwa yoh u psiah chapoh ka ri Romania kiwa da yoh leh u liwan.
