Ynne ka sngi man ko ka wow sahkynmoo ya ki khon Niamtre ka Seiñraij Ummulong, West Jaiñtia Hills heiwa da ye wow wai ya ka Yungwalieh ka Seiñraij Niamtre Ummulong deiwa emlang u Symbood Montri Rangbah ka jylla, u Sniawbhalang Dhar kam u kongsan wa u MDC ka Moodymmai Ummulong Constituency, u Jesse Suiam kam u symbood kongsan.
Ha kani ka sngi da emlang u Dolloi ka Elaka Jowai, u Puramon Kynjing, u President ka Seiñrai Jowai, u Hercules Toi, u Dolloi ka Elaka Nartiang, u S. Lamare wa kiwi kiwi.
Da pynman ya ka yalang wa tbian ha Yungwalieh ka Seiñraij Ummulong heiwa ya ka yalang da pynlai da u Rilangki Siang uwa man kam u Vice President wei da yoh ya ki kyntien Ngooh Blai na u Knermiki Passah uwa man leh u Chairman ka Chlem Sikai Niamtre ka Seiñraij Ummulong.
U General Secretary ka seiñ, u E. Rymbai hawa khana ya ka parom wa tbian da ong u wa ki warim wajah na Jowai da mih ki wow chong chnong wei da sdang ya ka seiñ ha u 1909 deiwa kynthup ya ka kur Shylla, Laloo, Kyndiah wa ki War. Wei da sieh chipor ya ka Seiñraij hajan ka Yung Club ka chnong wei hadien ini hawa pyrkhat bha da rai ki wow chna noh ya ka Yungwalieh wow pyndep ya ka Baamphalar waka Behdieñkhlam.
Ya ini i thaw wa da chna ya ini i Yungwalieh wa katni toh iwa e sñiawbha na ka Bih Passah waka Mariam Passah kiwa da e thaw mynkna nadooh u 1968 wow sdang tei ya ini i Yungwalieh wei ha u 1990 da sliah yei yung wa rim yow sdang chna ya ini i Yungwalieh iwa thymme.
U Jesse Suiam da ong u wa dap u dei sñiawkmen wow embynta u ha kani ka sngi deiwa kyntu ya waroh ki khon ka Seiñraij Ummulong wow pynneh pyndap ya ini i Yungwalieh wei dang emkaam chiboon i e yarap neibynta kani ka yung khnang wow pynneh pynsah ya ka dustur riti.
Da kynmoo u ya ki snem wa da lai deiwa e khublei ya u Trekirot uwa da yah luti wow pynneh pynsah wei wow pynmiat ya kani ka yung khnang wow neh ka burom yong ki hadien habood.
U Sniawbhalang Dhar won da ong u wa i chna ya kani ka Yungwalieh ymtoh iwa suk, deiwa ong u wa kani ka Raij nadooh ki khynroo wa ki manbei manpa toh kiwa kreh chitom. Da pynrap u wa i yoh ya kani ka yung toh i dak i jop kam ka chnong.
Da yaroh u leh ya ka chnong wa da em ki i yatylli hapyrdi ki bru wa ngait ya jar jiar i ngait niam iwa pynyoo yei synchaar paidbah iwa man salonsar, deiwa kyntu wow pteiñ ya ini i kaam waroh.
Chooh chooh da ong u wa sñiawkmen wow yoo leh yei wan chimbynta na ki chnong najan najngai wa wan cha kani ka thaw ynne ka sngi deiwa pynbna leh wow e yarap poisa wa T. 10 lak cha ka Seiñraij Ummulong wow pyndap yeiwa emkaam ha kani ka Yungwalieh.
Kiwi kiwa da klam ha kani ka sngi kynthup ki ya u Waheh Chnong ka Ummulong, u L. Laloo, u Hercules Toi, u Puramon Kynjing katwa ya ki kyntien khublei da yoh na u D. Shylla uwa man u Secretary ka Construction Committee, ka Seiñraij Ummulong.
Da wai paidbah leh ya ka Thup Sahkynmoo wa da pynkhreh da ka Seiñraij Ummulong wei da pynphooh pynphieñ ya kani ka sngi da ki rwai wa ki chaad na ki khon ka Seiñraij Ummulong.
Discussion about this post