U Vice President ka ri, u M Venkaiah Naidu kam chibynta i lai hiar lai pait u ya ki jylla ka Northeast India heiwa da sdang nyngkong u na Assam heiwa ynnin ka sngi da poi u cha Meghalaya. Ha Assam da chimbynta u leh wow kynmoo warom ya u Montri Rangbah wa nyngkong dooh ka Assam u Lokpriya Gopinath Bordoloi heiwa da saam u leh ya ka Lokpriya Gopinath Bordoloi For National Integration & Contribution Award ha ka yalang wa pynman ha Guwahati.
Ya kani ka Award da e leh cha ka Shillong Chamber Choir wa kiwi kiwi de.
Ha Meghalaya, u Vice President da chimbynta u wow booh mooyurim yow chna pynheh ya u sarok Shillong-Dawki wei da chimbynta u leh ha ka Workshop wa e pyrtuid kam ka ‘Changing Role of North-Eastern Council’.
Kam chibynta wow pynyoo cha u Vice President ya ka dustur rita ka jylla Meghalaya, da pynman leh ya ka tamasa ha Raj Bhavan, Shillong wa pynyoo ya ki rwai ki chaad tynre na ki jaitbru wa em hapoh ka jylla.
Deilang wa u Vice President, da emlang leh u Montri Rangbah ka jylla, u Conrad Sangma, u Symbood Montri Rangbah, u Prestone Tynsong, u Lat ka jylla u Satya Pal Malik wa kiwi kiwi de ki heh sorkar.
