Samoi i sur ka bom ka bhuri ha ki Soo Sngi Le Yaw

Jowai: I sur wa ood wathai ka Bom wa ka Bhuri da kynræh biang yei man i sñiaw yong uwi pa uwi ha ka yurim yong ka Behdeiñkhlam ka chaad wa wanrah yeitæ i sñiaw i man iwi wei i yatylli deiwi i sur iwi i dur hajrong i biar i ktieh. Deiwi i kyntien u ong kani toh ka Chaad kawa da hukum nadooh nachwa nalap ki sngi da u Trekirot yow khon Ñiaw-Wasa Wasung.

Ong ki kyntien u Trekirot, “Man uwa chaad hok hajrong i biar i ktieh, ka moo ka deiñ chaad heiwon iwon i thaw wa jakhlia tam hei rupai yong me u pyndep O dei mynsien yong nga wei u yoh mi leh yei kyrkhu”. Kam ki bru wa yachimbynta ha kani ka Chaad Niam emkaam u bood ya kini ki hukum adong u Trekirot wei chim leh u pyndep ya kiyi kiyi ki sarin yong ka da ka luti yong i Tipbru-Tipblai.

Ka chaad niam Behdieñkhlam man ko leh i sarong ya ka jaitbru heiwa bna i rong i that yong ka wei pynyoo ko leh yei man kyrpang ka Raij ka chnong hakhmat ka pyrthai myndær kawa ki lok ki jor na-jan wa na-jngai wan yoohkjat ki hapoh ka chong ka thaw wow sakhi yei man i long yong ka.

Chaad Niam Behdieñkham mut ko leh i por iwa yoh u yoo u sakhi yei yieñ tylli ki khon ka dong ka chnat wow chna ya ki rot ki rong ha jar jiar ki Yungwalieh, u pyntoh pyntne wei rong i rah ya ka Dieñkhlam na khloo na kjam neitæ chooh chooh ya ki sarin ka niam ha yung ha sem da pyntoh pyntne wei u pyndep deilang u kñi wa ka kchu ka siang katwa ya ka niam yonglang hapoh ka Raij da pyntoh pyntne wei pyndep chirup i yakrehlang u Dolloi kam u khlieh ka niam khlieh ka Elaka deilang u Pator, U Langdoh, ka Langdoh, Ki Sangot wa ki Wasan waheh iwa man katkam ki hukum, adong wei mon i khe u Trekirot.

Iwa khaddooh chim wa kani ka Chaad Niam Behdieñkhlam u man ko i por wa wan kyrsu ya uwi pa uwi, kawi pa kawi dei wow man ki bru kiwa lai katkam ki hukum, adong u Trekirot ha yurim wow pynthymme yei pyrkhat pyrdaiñ wei u pynjanai leh yei man i long wa-miat wa-bha na i dæ samen samen, ha ka yung ka sem wa ha ka imlang sahlang waroh kawi iwa man da ka luti yong i chaan kylliang-yarap kylliang.

“ Chaad Niam Behdieñkhlam wa-suk wa-kmen yaphi waroh