Da: I kong Filtina Lyndem, Senior Citizen
Ha ka snem 1952, nga dang shong Class 9 bad nga shongkul ha Welsh Mission Girls High School ne skul kynthei bad nga kynmaw kyndiang ba nga soi kyrteng kum iwei na ki Volunteer ha ka jingїakhih pyrshah ia ka jingthung dkhot ne MDC shu sieh ha ka United Khasi bad Jaiῆtia Hills Autonomous District Council. Kumta ha kane ka jingrakhe ia ka jingdap san phew snem ka jylla, ngi dei ruh ban kynmaw ia ki jingjia, kiba їalam sha ka jingїaleh Hill State.
Ha ka snem 1923, la thaw ia ka Khasi National Dorbar bad ka dei ka khep History kaba kyrpang ha kaba ka jingangnud ban synshar hi da lade їalade ka la sdang ban pun bad kyan jur. Hadien ba ka ri India ka la їoh jinglaitluid ha ka 15 tarik August 1947, ka jaidbynriew Hynñiewtrep ka їatyngkhuh bad ar tylli ki jingkylli; kawei, ban laitluid syndon na ka jingsynshar jong ki bor nongwei bad ar, ban їasnoh bad ka ri India. Ka mat kaba nyngkong, kata ban laitluid shi syndon, ka long kaba jwat ia ki hima bad ka ri Khasi kaba rit. Kumta ngi jied ban їasoh bad ka ri India, bad ki Syiem jong ki Hima Khasi ki la їasoi ia ka Instrument of Accession. Ngi tip ruh ba dei ha ka snem 1949 ba la thaw ia ka dorbar shna riti ne kata ka Khasi States Constitution Making Dorbar bad ha kane ka Dorbar la їatai-їathir nia halor ka lawei jong ka ri Khasi.
Ha ka snem 1952, la pynlong ia ka United Khasi bad Jaiñtia Hills Autonomous District Council, katkum ki kyndon jong ka Sixth Schedule jong ka riti synshar ka ri India. Ka jingthung ia u dkhot lane ka jingsieh ia u MDC u bym dei Khasi, ha District Council da ka sorkar Assam, ka la pynbitar ia ki Khasi bad la khie puk ka jingїakhih paidbah ban pyrshah jur ia kane ka jingleh jong ka sorkar Assam. Їa kane ka jingїakhih paidbah la lam khmat da i bah Hoover Hynñiewta, i bah Molen Swer bad kiwei kiwei. Bad ka їing jong i bah Molen Swer hi ruh kaba ha Mawkhar ka dei ka їing seng na ka bynta kine ki kam ba ki їathmu.
Ha ka step jong ka 27 June 1952, la pynlong ia ka jingїalang paidbah ha ka Hall jong ka Khasi National Dorbar ha Mawkhar. Ha kane ka step, ka Hall ka la khapniah bad shlei da ki paidbah ba bun kiba la wan na kylleng ban їashim bynta ha kata ka jingїakhih paidbah pyrshah ia ka jingthung ia u MDC shu sieh. Ha kane ka step ruh don shibun bah ki samla pule kiba kum ma nga, kiba la soi kyrteng ban long ki Volunteer bad nga kynmaw ia ki parlok samla na Riatsamthiah kiba la їasoi kyrteng ryngkat bad nga, kum i Meera Malngiang bad kiwei kiwei. Kiwei pat ki nongїalam kiba ha khmat eh, kiba nga kynmaw kiba don ha kata ka jingїakhih paidbah ki long; i kong Lina Adel Laloo bad kong Enit kiba na Mission Compound, kong Moreen Lyngdoh, Plain R Mawthoh, L. Gilbert Shullai, Stephen Lyngdoh, Markan Lyndem, Dr. John Victor Diengdoh, Hamlet Bareh, Stetnel Shylla, Wattis War bad kiwei.
Ka jingїaid paidbah ka la sdang na ka Hall jong ka Khasi National Dorbar sha Motphran ha kaba ka bor District ka la pyni bor bad khanglad ia ki paidbah ban їakhih, bad u Perry uba long ha kato ka por u Deputy Commissioner, u la hukum ban khang ia ki paidbah ban pynlong ia ka jingїakhih pyrshah. Hynrei ki paidbah ki la pyneh hi triang bad ka bor District ka la hukum ban bom, ban tied bad ban siat tdem pynsat khmat sha ki paidbah. Kumta bun ki paidbah ki la mynsaw jur ha ka jingshah bom pulit bad sat ki khmat ha ka jingsiat Tear Gas. Nga kynmaw ba ka surok Mawkhar lynter haduh ka ophis jong ka Dorbar Syiem Hima Mylliem ka la lynguh hi pum da ka tdem Tear Gas. Hynrei ha kajuh ka por pat, ki longїing kiba shong їing harud jong ka Mawkhar Main Road, ki wanrah la ki borti bad ki um ban ai sha ki Volunteer/paidbah ban sait ia ki khmat ban lait na ka jingsat tyrha Tear Gas. Ma nga bad i Mera, ngi la їoh jingїarap na ka їing jong i kong Lin Jyrwa (Oasis). Hapdeng ka jingїasiat tdem pynsat khmat bad jingbom lathi, ki pulit pat ki la nang kem ia i bah Hoover Hynñiewta bad ia kiwei, hynrei mar mar kumta hi noh, i bah Plain R Mawthoh bad bah Stephen Lyngdoh ki la shimti wut wut kum ki nongїalam bad ki la їalam ia u paidbah sha thanat ban dawa na ki bor District ban pynlait noh shi syndon ia i bah Hoover.
Ka jingїakhih paidbah kaba la jia ha ka 27 tarik u June 1952 ka la pruid lynti shisha ia ki jingїakhih kiba bud, kiba їalam sha ka jingїakhih ban їoh la ka jong ka jylla. Tang ha ka snem kaba bud, ha ka 29 tarik u December 1953, ka sorkar India ka la shim ia ka rai bad thaw ia ka States Re Organization Committee. Namar kata ka daw, ym lah ban len ba ka jingїaleh ban їoh la ka jong ka jylla ka la sdang ban rhem naduh ka snem 1952.
Ha ka snem 1954, ka States Re Organization Committee, ka la wan jngoh ia ka Khasi bad Jaiñtia Hills ban wad bniah bad sngewthuh ia ki jingїakhih bad jingangnud jong ki trai ri trai muluk, kiba kwah ban їoh noh la ka jong ka jylla ban synshar hi da lade їalade. Kumta ka Khasi National Dorbar ka la aiti ia ka dorkhas ban dawa ia la ka jong ka jylla ha ka States Re Organization Committee ha ka 1 tarik u April 1954.
Naduh ka snem 1954 ter ter, ki la don shibun ki jingjia, ki jingїaleh bad jingїakhih paidbah na ka bynta ban їoh ia ka jylla kaba pura. Khadduh khadwai, ha ka snem 1971 ka Їing Dorbar Thaw aiñ ka ri India ka la pdiang bad mynjur ia ka aiñ, ka North Eastern Areas (Re organization Act) 1971 bad lyngba kane ka aiñ la pynbna bad pynlong ia ka Jylla Meghalaya kum ka Jylla ba pura ha ka 21 u January 1972.
