Uwi u bru da chah kem u ynnin ka sngi neidaw wa pynlai u ya ka yung bichaar thok kawa da pynmih hadooh ki hukum heiyatoh wa i yaknieh thaw ha Gujarat, wei uni u bru wa emkti wow leh yeini toh uwa tip kam u Morris Samuel Christian (37 snem) uwa da sdang wow pynmih ki hukum namo ki Judgement nadooh u snem 2019 khamtam heiyatoh wa i yaknieh thaw ha ka thaaiñ Gandhinagar ka jylla Gujarat.
Yeini waroh da chemdien hadien wa em ka mukotduma wa da yaleh heiwa uwi u bru wa tip kam u Babjujit Thakor da kam u yei mantre yei thaw ha thaaiñ Paldi deiwa pynyoo ya ka Claim Certificate wa da pynmih da ka yung bichaar u Morris wa da e u hapoh ka aiñ Arbitration & Conciliation Act, 1996.
Ini da pynkhyrngiat ko ya ka yung bichaar heiwa ki pulit leh da pynman ki ya ka takit wei da chem wa u Morris la san snem kattu da sdang u da ka yong oo hi ka yung bichaar ha Ahmedabad deiwa pynchna u leh ya ka thaw bichaar kawa sariem wa ki thaw bichaar ka sorkar deiwa booh u leh kiwa kreh wei oo da man u kam u Judge.
Ki bru wym tip khamtam kiwa ya kajia thaw da ngait ki wa kani ka yung bichaar u Morris toh ka yong sakhiat heiwa da kular u leh wow pyndep smat yei bichaar deiwa pynngat leh ki kuna wa heh wei chim poisa u leh yow pynmih ya ka hukum wa pynjop.
U Morris da pynmih hukum u leh wow e yei thaw yong ka sorkar cha uwi u bru uwa da lai wow booh yei pyrtuid u kam u tre thaw hapoh ka chnat Revenue.
Ini ymtoh i sien wa nyngkong wa jia kamni ha jylla Gujarat heiwa ynnin u snem da chah khang leh 6 tylli ki yung krehkaam thok kiwa da kam toh ki yong ka sorkar hi.
Discussion about this post