Ka Jaiñtia Students’ Movement Saphai Unit ynne ka sngi da e dorkhat ko ha u Deputy Commissioner ka West Jaiñtia Hills District hajrong i duna wa em ha ka thaaiñ wa khamtam ki san tylli ki mat dawa neibynta ka PHC Iooksi, West Jaiñtia Hills.
Ka seiñ da dawa ko wow thung ya u Medical wa u Health Officer ha kani ka PHC, neibhah hadooh kattæ em du uwi u Medical & Health Officer wa pait ya ki 17,000 ngut kiwa chong chnong na ki 17 tylli ki chnong.
Da dawa ko leh wow booh sa kawi ka Ambulance ha kani ka PHC wow kit ya kiwa pun-khon wa ki khynnah, neibhah katkam wa man katni ym em Ambulance wa kit yaki paidbah wa chitom wei kani ka thaw sumaar em ko kamwa 60 Kilometer na Jowai.
Chooh chooh da dawa leh wow booh ya ka Generator Backup neibhah wa ka chnong chem chitom ko neipor cheipor hei rukom saam bordiñ wei ini da pynthut i yei krehkaam ka PHC khamtam ya kiwa chitom, wow pynbiang um kawa khooid neibhah wa ka um wa tngit ye ko wow ktah ya i chait i khiah kiwa kreh yong ka thaw.
Heijooh i por da dawa leh wow booh ya ka X-ray neibhah hadooh kattæ ym em kor X-ray ha kani ka PHC.
Neiliang ka seiñ da ong ko wa ya ka dorkhat wa da e ha u DC daw phah cha ka chnat i chjait i khiah ka jylla khnang wow leh ko yeiwa emkaam.
