Kam chibynta wow ya kynrong lang ya i khia wa chon nei yabi khñiang khlam ha ki chnong ki thaw, ka Khasi Students’ Union hapoh i yakhmat u President wa Rangbahdooh u Lambokstarwell Marngar, ynne ka 26 tarik da e sñiawbha da ki san tylli ki tadong la-ær Oxygen wa kamwa 20 tylli ki PPE (Kit) cha ka Dr. H. Gordon Robert Hospital.
Ka seiñ da ong ko wa ini i leh ko toh kam i dak wow ya ksohkti lang wa ki thaw e sumaar wow yakhun pyrchah ya ka khlam COVID-19. Wei ini da man ko ka sien wa nyngkong wei ka seiñ wei daw lai ko leh cha kiwi ki Hospital wow pyrchang yarap katwa joh i bor wa khian.
Ha kani ka sngi da emlang ki Doctor wa ki wakreh yong ka Robert Hospital kiwa da pdiang sñiawbha ya ini iwa e khian kiwa man kam wow e kyrmen ya kiwa boon wa lang hawa emkaam ha iwon iwon i por.
Ka seiñ da kyntu ko ya ki Hospital waroh wow pynyinsur ya i dor i mur hawa wan chah sumaar neibhah wa hap wow pyrkhat lang ya ki wym yoh wym dap.
