Sangeh chah thngan ki wakreh 108 hapyrdi wa syir mynsien yei dooh kreh

Shillong: Ki wakreh ka GVK EMRI 108 kiwa em hapoh ka lama Meghalaya EMRI Workers Union (MEMRIWU) da sah ki hei langoh hadien i yachem wa u montri ka chnat i chait i khiah, u AL Hek ynne i janmiet ym em u mih soh mih sla i neibhah ka sorkar ymye ko wow kular lada ki kaam wa kreh ki daw neh i lada pyndam noh ya ka Company GVK na kani ka jylla kamwa da dawa da ka Union.

Ha ka yalang ki dkhot ka MEMRIWU hei emlang ki dkhot na ka Khasi Student Union (KSU) wa ka Federation of Khasi Jaiñtia and Garo People’s (FKJGP) wa u montri, ka Union da dawa bait wow pynkut noh yei yakreh wa ka GVK ha kani ka jylla neidaw wym burom ko ya ki kular.

Hadien ka yalang, neiliang u President ka MEMRIWU, u Roipar Kharraswai da ong u wa ka Union ka da pynsñiaw ko yei kwah wow pyndam noh ya ka GVK na kani ka jylla, tangwa ka sorkar ympu ye ko wow bahkhlieh ya ki wakreh ka GVK EMRI.

Da ong u leh wa tieñsar u wa hadien 11 snem wa chakri ya ki paidbah ka jylla, kattu u chah noh hi-eh ki wei ini man i i wym ye u pdiang.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U Kharraswai da ong u wa ka Union ympu em u ye ko u chim ka rai lada u pteiñ kreh biang namo u pteiñ ki yei yakhih tangwa ka rai wa khaddooh daw chim hadien wa da phyllu lang wa waroh 205 ngut ki dkhot wa chong yakhih.

Chooh chooh da ong u wa i yachem man i iwa sepai hanlada ka sorkar smat ko wow pyndam noh ya ka GVK na kani ka jylla, wei i kreh yong ki em i hei maa lada wan chimkti da kiwi tawon ki Company.

Hajrong i wymye ka sorkar wow kular u pynneh yei kreh yong ki pynyoo i lakam wa ka sorkar dang kwah ko ya ka GVK wow dang krehkaam ha Meghalaya wei da suba wanoh chiliang ka pyrla ka sorkar.

U President ka MEMRIWU da ong u leh wa ka Union daw pynjoor chooh chooh ko yei yakhih hanlada pyndam noh yei yakhih chah thngan.

Da pyntip u leh wa ki ympu lai kreh ki kat wympu ye ka Company u pynman ya ki dawa kiwa hadooh 36 tylli yeiwa da pynhiar ya ki dawa du cha ka 8 tylli donhi.

Hawa yaklam wa u Hek da ong u wa i yaklam ympu man i iwa kut wei neiliang ka sorkar da klam che ko wa iyi wa ye u leh wei daw yachem pyrkhat biang yeini chwa wow chim ya ka rai.

Chwa i yachem wa u montri, ki dkhot ka Meghalaya EMRI Workers Union (MEMRIWU) ki da sangeh noh ki yei yakhih chah thngan iwa da neh hadooh 12 sngi wei da pynbna wow pynjoor biang yei yakhih hei emlang ki dkhot na ka KSU wa FKJGP.

Ynne ka sngi da yachem hapyrdi kiwa pynlai ka GVK, wa ki dkhot ki seiñbhalang chirup wa ka MEMRIWU, tangwa khlem poi i cheiwon cheiwon

Neidaw wa thmu wow pynjoor yakhih ka Union neiliang ki bor pynlai ka District da phah ko ya ki Magistrate wa ki pulit ha ka thaw yakhih ha Lawmali, Shillong nadooh 8:00 waje i step khnang wow lait na iwon iwon i kulmar.