Sangeh ka yakhih kiwa kreh ka MCCL hadien wa yoh yaklam wa u CM

Shillong: Kiwa krehkaam ka MCCL hapoh ka lama yong ka Mawmluh Cherra Cement Employee’s Union da pynsangeh noh ki ya yakhih wa pynman ki ha ka thaw pynyeiñ kari ka Additional Secretariat, Shillong ynne ka sngi du hadien kattu katni kynta neidaw wa u montri rangbah, u Conrad K sangma da khut noh u ya ki wow yaklam ya ki dawa yong ki.

Hawa yaklam wa ki laad pathai khubor hadien wa yachem ki wa u Conrad, u President ka Union, u S Diengdoh da ong u wa ka Union u pynsangeh noh ko ya kani ka yakhih hadien wa u Conrad da kular u wa mynstep ka sngi daw khut ya ka yalang hapyrdi kiwa pynlai ya ka MCCl kamjooh wa ki sahep wa pait ya kani ka kaam wow yaklam yei eh i khoo kiwa kreh kani ka karkhana wei hadien ini daw khut u ya kiwa mihkhmat ka Union ha kine ki sngi wow wan.

U Diengdoh da pyntip u wa u Conrad da kular u wow pynlait noh ya ki su kiwa kreh hapoh uni u bnai, wa kynthup ya ka tulop wa da sahkut kattu la 8 bnai kawa man nadooh u Naikhynde (Sep) u snem 2015 hadooh u Wisu (March) 2016 nalor i su ya iwa kreh palat por.