Jowai: Ynne ka sngi da ka Joint Action Committee (JAC) yong ki tre kari (truck) wa kit mar ya ki karkhana pynmih khyndaw-bilat wa kynthup ya ka All Jaiñtia Cement and Clinker Transporters Association (AJCCTA) waka Jaiñtia Hills Truck Owners Association (JHTOA) chirup wa ka Meghalaya Truckers Union (MTU) da yachem ki ya kiwa kitkaam ka All Jaiñtia Cement Manufactures Association (AJCMA) ha Topcem, Wahiajer, East Jaiñtia Hills.
Ya ka AJCMA da wan mihkhmat da u RK Pareek uwa man u President wa u Pawan Joshi uwa man kam u Secretary ka Association.
Ka yachem ynne hapyrdi ki ar liang toh wow yaklam pynbait heiyatoh wow pynkrehkaam ya ka rai ka sorkar jylla lyngba ka chnat Transport Department wa da pynthymme yei bai kit mar na ki karkhana pynmih khyndaw-bilat wa da pynmih ha ka 13 tarik Duyatra (January) 2020.
Ka yalang da man ko kawa chit heiwa ki dkhot ka JAC da yieñ skem ki thij hajrong i dawa katwa neiliang ka AJCMA won da paan por ko hadooh 30 tarik uni u bnai wow pyrkhat yeini wei ini da pynbor i ya ki dkhot ka JAC wow mih na ka yalang dei chrai da ka rai wow sangeh noh u kit mar na wa cha kini ki karkhana.
Hadien ka yalang hawa yaklam wa u RK Pareek da ong u wa kani ka hukum ka sorkar ym krehkaam ko ya ki karkhana neibhah wa man ko ka yong samen (Private Company) wei da ong u leh wa neiliang ki kakhana daw chong pyrkhat ki hajrong ini wei wow e rai chwa ka 30 tarik.
U Pawan Joshi da ong u wa lada sangeh kit mar ki truck daw chem chitom ki paidbah neibhah wa daw duna i khyndaw-bilat ha ki yaw ki haat wei ini won daw pynbor i ya kiwa dai wow pynku dor ya ki.
Kini ki ar ngut da pyntip ki leh wa lada ki truck sangeh kiwow kit mar ki leh ymyohsa ki wow pynemkaam ki da ki kari wa em ha ki wow kit ya ki mar.
Hawa yaklam won wa kiwa yahkhmat ka JAC, u Nidamon Shullet da pyntip u wa i daw wa kongsan dooh wa dawa pynkrehkaam ya i dor thymme toh wa katkam wa man katni ym im de ki truck wei boon hi chem chitom ki wot wow su ya ki ram kari wa da chim ki heiwa da em ki kari wa da chah taan noh ha ki Bank.
Da pyntip u leh wa nadooh ynne ka sngi da rai wow sangeh noh wow kit mar cha kini ki karkhana kat hadooh wympu pdiang ki (karkhana) ya i dor thymme wa da booh ka sorkar.
Neiliang u Balen Thubru da kyntu u ya ki tre truck wa ki Transporter waroh wow man ki kiwa krehlang khnang deiwa sangeh wow kit mar nadooh ynne ka sngi kat hadooh wa ympu yoh ya i dor wa thymme katkam wa booh ka sorkar.
