Sangeh yakhih ka AMSSASTA hadien wa kular u Conrad wow pynlait noh ya ka tulop yong ki

Shillong: Ka seiñ kiwa sikai hapoh ka lama ka All Meghalaya SSA School Teachers’ Association (AMSSASTA) da pynbna ko wow pyndam noh chwa yei thmu wow pynman ya ka yakhih namo ka dharna, kawa da booh wow pynman ha ka 21 tarik uni u bnai hadien wa kular u Montri Rangbah, u Conrad K Sangma wow chimkhia wow pynlait noh ya ka tulop yong ki kawa da sah la soo bnai.

U President ka AMSSASTA u Marngar da ong u wa ha i yachem wa u Montri Rangbah ha ka 16 tarik uni u bnai, da kular wa ka sorkar daw chimkhia ko deiwa paan por hadooh wa kut uni u bnai wow su noh ya ka tulop kawa dang sahteiñ.

Da ong u wa hadien ini i yachem da pynman ya ka General Executive Committee Meeting wow yaklam chaphang ini kawa ympu em pynlait nadooh u Naitung yong uni u snem wei hadien i yachem wa u Montri Rangbah ha ka 16 tarik uni u bnai da rai wow sangeh chwa ya ini i yakhih neibhah u Conrad da kular u wow chimkhia yeini hapoh uni u bnai.

Da pyntip u wa neiliang ka seiñ da thoh ko cha u Conrad wa u Montri ka tnat puræ heiyatoh wa i eh i khoo wa yachem kiwa sikai neidaw wa chah kset ka tulop yong ki.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Katkam wa ong u Marngar ka tulop kiwa sikai Upper Primary toh T. 20, 493, tangwa da chah pynduna noh cha ka T. 20,000 wei ka tulop kiwa sikai ka Lower Primary ka tulop waroh chi kattu toh T. 19,943 kawa da chah pynduna noh cha ka T. 15,000 chi bnai.

Da pyntip u leh ha i yachem wa u Conrad, da kular wa ka sorkar jylla wow pyndap yeini i chah khate ka tulop ki.

Heijooh i por da ong wa ka AMSSASTA lada ym pynmankaam yeini i kular daw chim da kiwi ki luti wow yakhih.