Ka Meghalaya Commercial Truck Owners and Drivers Association (MCTODA) Jaiñtia Hills Unit da pynman ko ya i yakhih nadooh ka 6 tarik wa khlem booh por namo ka Indefinite Strike deiwa dam u kit ya u Coke na ki karkhana wa em ha Ri-loom Jaiñtia.
Ynne won da em ka yalang yong ka MCTODA wa ka East Jaiñtia Coke Manufacturing Association (EJCMA) kawa man ka seiñ ki karkhana Coke deiwa emlang ki heh District ka East wa West Jaiñtia nadooh ki DC wa ki SP ha Conference Room ka yung krehkaam u DC ka East Jaiñtia Hills.
Kam wow kdaw heini ka seiñ ki tre Truck da dawa ki na ki karkhana Coke wow pynku ya ka bai kit na ka Rs. 1400 cha ka Rs. 2500 chi Ton.
Hadien wa kut ka yalang hawa yaklam wa u DC ka East Jaiñtia, u Shivansh Awasthi da ong u wa da khut ya ka yalang ki ar seiñ ynne heiwa da pynsñiaw ki yei chitom ki wei ki karkhana da paan por ki 10 sngi wow pyrkhat hajrong i dawa ki tre Truck.
Neiliang u Justine Dkhar uwa e buit ka EJCMA da e khublei u ya ki DC wa SP ki ar District wa da khut yaklam ya ki ar seiñ heiwa ha ka yalang da rai wow sangeh i yakhih ha i janmiet wei u yachem biang ki ha ka 19 tarik uni u bnai.
Hadien ka yalang, ki heh ka MCTODA da lai ki cha Mawryngkneng wow khana ya ki dkhot heiyatoh wa ka rai wa mih na ka yalang ha Khliehriat wei da chong pyrkhat ki leh para ki heiyatoh wa ka luti wow lai ki chaphrang.
Hawa yaklam wa u Mosklandar Marngar, u Chairman ka MCTDOA da ong u wa u sangeh ki wow yakhih chipor heiwa u dam hi chwa ki wow kit ya u Coke na R-loom Jaiñtia weiwa ha ka 19 tarik uni u bnai daw yachem biang ki wa ka EJCMA wow ap hajrong i pynsñiaw yong ka.
Chooh chooh da ong u wa ki karkhana wa em Truck ki yong ki hi, ye ki wow kit ya u Coke.
Discussion about this post