Ki yalehke ka Super Division ka Saipung Block Sports Association (SBSA) wa pynman ha chnong Lamyrsiang da pteiñ biang ynne ka sngi wei man ki leh ki yalehke wa khaddooh chwa wow sdang ya ki yakhun Semi Final ha kani ka 27 tarik.
Ynne da pynman ar tylli ki yalehke kawa da sdang chwa hapyrdi ka Tluh SC waka Mulait FC heiwa da jop da ka Tluh da 2-1.
Ka Muliat da yoh ko wow thap kool nyngkong lyngba u Raplang Suchen heipor 18 minit tangwa ka Tluh da su kylliang ko lyngba u Rida O Pdang ha ka minit wa 29 wei da pynjop da u Wom Tangliang ha ka minit wa 62.
Ka yalehke wa bood da pynman hapyrdi ka Jarai SC waka Jalaphet Bri Sumer SC heiwa da jop ka Jalaphet da 3-1.
Ya ka Jalaphet da thap kool da u Jas Chyrmang ha ka minit wa 18, u Stephan Lal ha ka minit wa 44 wa u Staphan Pale ha ka minit wa 83 katwa ya ka Jarain da thap kool da u Amarson Lyngdoh ha ka minit wa 48.
Da ini, ka Jalaphet Bri Sumer waka Mulait United da yoh ki wow psiah Semi Final na ka Group B deilang waka Lamyrsiang SCC waka Latyrke SC kiwa da yoh u psiah chwa ini wa dep na ka Group A.
Ki yalehke Semi Final toh kiwa da yabhah ha ki ar bynta kitæ ka 1st wa 2nd Leg heiwa ka 1st Leg u pynman ha kani ka 27 tarik katwa ka 2nd Leg u pynman ha ka 1 tarik u Naichiphaw kiwa ye phi u yoo heini ha wah.
