Kam chibynta ka sarin pynpsiah dkhot namo ka Enrolment Drive ka UDP Jowai Circle wa da pynman ha ka 11 tarik uni u bnai hapoh ka yung Hall yong ka Lumpyrdi Mihmyntdu, da wan wow pynskem ya kiwa ksoh kaam ka UDP Mihmyntdu Pyllun hapoh i yahkhmat u President ka UDP West Jaiñtia, u Moonlight Pariat uwa man leh kam u kyrtong ka UDP na 2-Jowai Constituency wa u Kitboklang Nongtdu, President ka Jowai Circle wa kiwa yahkhmat ka Party.
Ha kani ka sngi da jied ya kiwa kitkaam ka UDP Mihmyntdu Pyllun kiwa man kamni ha wah:
- President- Chem Biam
- Vice President- Pdein Chyrmang
- Secretary- Ribait Rymbai
- Assistant Secretary- Bormi Shyrmang
Ki Advisor- Ebor Chyrmang, Wakham Chyrmang, Sambha Phawa wei da jied leh ya 20 ngut ki Executive Member.
Kiwa ksohkaam ka Women’s Wing
- Chairperson- Bilinda Phawa
- Vice Chairperson- Nika Sana
- Secretary- Bud Phawa
- Assistant Secretary- Leki Phawa
Da jied leh kamwa 17 ngut ki Executive Member.
Neiliang u Moonlight da pynsñiaw u yei kmen wow yoh u pynskem ya kani ka chnat kitkaam ka Party hapoh ka chnong Mihmyntdu deiwa yei u pynpsiah dkhot leh 347 ngut cha ka UDP ha kani ka yalang, da pynkynmoo u leh wa ha kini ki sngi kiwa da dep wa em i yaknieh Ticket hapoh ka UDP Jowai, wei wada em wa kam wa ya ka Ticket u yoh tikna cha ki 100% weiwa hapoh ka Jowai Constituency da yaklam bha kiwa chong chnong wa kat kiwa yoh ya ka Ticket UDP da em i kyrmen kawa heh wow jop na ka Jowai Constituency neibhah da yoo i ha Meghalaya iwa boon toh jooh wan ki sorkar synroplang wei du ka UDP donhi ka wym em yachoon wei kawa yajan wa waroh ki Party kiwa em hapoh Meghalaya wei da man ko kam ka kynthai kawa miat khyllood. Kamtæ da kyntu u leh ya kiwa kitkaam wow nang kreh ki ha Mihmyntdu wow pynyoh boon ka Vote ya ka UDP.
U Kitboklang Nongtdu, President ka UDP Jowai Circle da ong u wa ini i psiah dkhot wa pura cha ka Party pynmman ko ya ka Party wow nang ye chooh chooh u pynjanai heiyatoh wa ka synchaar ka khaddar, da kyntu u leh wow wan mih cha ka yalang paidbah ka UDP kawa daw man haka 13-01-23 heipor 11:00 waje i step ha Madan Siat Thong Seiñraij Shopping Complex wa em hajan ka yung krehkaam ka JHADC, Jowai. Kamtæ da khutlang u ya waroh kat kiwa ye u wan wow ap ya kani ka yalang paidbah.
U Marki Mulieh, Ex-MDC hawa e yei klam da ong u wa i kyrchaan yong oo ya u Moonlight Pariat toh da jooh ya man MDC lang ki wei da yoo u wa u Moonlight Pariat man u uwa chemphang wei uwa em i tip u kreh paidbah wei da pynkynmoo wa haka Election MLA 2018 da yakun pyrchah u ya u Moonlight wei ha kani ka kynti da e u i kyrchaan wa pura ya ka UDP kamjooh ya u Moonlight Pariat.
Da yoh leh yei klam tbian na kini ki waheh wa kynthup ya u Chem Biam, u Ebor Chyrmang, u Sambha Phawa, u Lephing Pyrtuh, u Esaid Siangshai, u Sanbok Rymbai, u Haoo Bareh, ka Slinda Syngkrem ha ka yalang wa da pynlai da u Ribait Rymbai.
