Shillong: Ka North East Forum for Indigenous People (NEFIP) ynne ka sngi da pynkhai biang ko ya ka yakhih wow pyrchah ya i thmu yong ka sorkar India wow pynkrehkaam ya ka Citizenship Amendment Bill. Ha Meghalaya ya kani ka yakhih da yahkhmat da ki seiñbhalang kiwa em ha ka Confederation of Meghalaya Social Organisation (CoMSO) kiwa man ki dkhot ha ka NEFIP, ya ka yakhih da pynman da iwa chong kyllaiñ myngor ha ka thaw yieñ kari kawa em hakhmat ka Additional Secretariat, Shillong nadooh i por 11 waje i step hadooh i por 5 waje i janmiet.
Ha kani ka sngi neiliang ki dkhot yong ki seiñbhalang da kbai ki leh wa toh u pyndam ya ka CAB wei wow e da ka ILP, kini ki seiñbhalang da pynsñiaw ki leh ya i pyrchah da iwa rah lang ki thoh ha ki kot bren wow dawa pyndam ya ini i thmu yong ka sorkar India.
Kam wow pynkynmoo wa ka sorkar National Democratic Alliance (NDA) wa yahkhmat da ka BJP, hadien wa da yoh biang ko wow synchaar ya ka ri India da pynbna wow pynkrehkaam bait ya ka CAB, kawa man neibynta wow tipmit kam kiwa chong chnong wa pura noh ya ki Hindu, Sikh, Parsi, Jain, Buddhist wa Khristan kiwa wan na Afghanistan, Pakistan wa Bangladesh cha India chwa u snem 2014.
Discussion about this post