Hapyrdi i em ki pulit wa boon, ka thap Vote ha Wapungskur da sdang biang ko kamwa da booh por nadooh 7:00 waje ynne i step deiwa mih rynthih ki paidbah wa boon.
U DC ka East Jaiñtia Hills, u Shivansh Awasthi da pyntip u wa ha Bataw leh ka thap Vote leh man ko ka kawa da sdang wei ini toh hadien wa jia ynnin wa em ki bru wa tympiah tympra ya soo tylli ki kor EVM kiwa em ar tylli ha Wapungskur wa ar tylli ha Bataw heiwa ka sorkar da phah ko wow pynman biang yei thap Vote.
Da pynkynmoo u leh wa da pynkrehkaam da ka Section 163 ka BNSS ha waroh kini ki ar tylli ki chnong yow khang yei yalang paidbah wei i pynthut yei lai i wan ki bru.
Neiliang u SP ka District, u Giri Prasad M da pyntip u wa ka takit dang lai ko chakhmat yow chem ya kiwa tympiah ya ki kor EVM wei kattæ iwa hakhmat toh yow pynbiang yei em ki pulit yow pyntikna wa i thap Vote man i iwa lai bait khlem da em i pynthut yow ye ki bru u lai Vote deiwa laitlooid.
Da pyntip u leh wa da em kamwa 70 ngut ki pulit du ha Wapungskur wa kynthup leh ya ki pulit kynthai wei ha Bataw da em 40 ngut ki pulit.
Discussion about this post