U MLA ka BJP uwa man leh u Montri ka sorkar jylla, u Sanbor Shullai ryngkat u President ka BJP Meghalaya, u Ernest Mawrie ynnin ka 30 tarik da lai pait ki ya u Inspector ka Customs and Central Excise, u Alok Kumar ha GNRC Hospital, Guwahati uwa da chah thombor ha ki damok haka 24 tarik u Khonchonglad (Nov) ha nongbah Shillong.
Kini kiwa yahkhmat ka BJP da kitbok kitrwiang ki ya uni u pulit ka chnat Custom uwa em hapyrdi i chah sumaar wei da e yarap ki leh da ka poisa ya oo khnang wow yoh u wow su yei lut i sep ha Hospital.
Kiwa ha-yung ha-sem u Alok da khana ki ha uwa yahkhmat ka BJP wa uni u sahep katni da chah ktah u hei bor ki chkoor hadien itai i chah thombor.
Neiliang u Alok da pynsñiaw u wa tip u yei jia ha Mukroh wei da em u ha Shillong yow pyndep yei chah hikai namo ka Training, wei ha katai ka sngi da mih u cha sarok wow lai thied dawai, tangwa sihbhah won wa boon ki dukan kiwa khang khyrdep lut neidaw wa em ka Rally hajan ka Civil Hospital, wei da yoo u wa em ki khynnah kiwa dih sikret kiwa da thombor wei dat ki ya oo nadien.
Ki Doctor kiwa sumaar ya u Alok da khana ki wa da sdang u wow chait u khiah bha katni wei da hap wow soor 16 thyrnia na khlieh wei katni da kyrriah noh ya oo naka ICU cha ka Private Ward.
