I khang sarok ya u National Highway 306, uwa man kam u thied snam ka Mizoram da poi i cha ka 5 sngi hadooh ynnin ka sngi Bibar, deiwa pteiñ ki ktien pynbaad kylliang hapyrdi ka Assam wa Mizoram heiwa kani ka kynaad ha ki bynta khappood da em i la 23 sngi.
Neiliang ka Cachar Deputy Commissioner ka Keerthi Jalli da thoh ko cha u DC ka Kolasib, Mizoram u H. Lalthangliana yow phah liwan yaki pulit na ki thaw wa haap chapoh ka Assam neidaw wa i em kini ki pulit da pynthut ko yei suk i saaiñ ka imlang sahlang.
Ka Jalli haka chithi cha u DC ka Kolasib da ong ko wa ki pulit ka Mizoram da tih ki leh ya ki dooid ki wow man kam ki thaw rieh wei katwa dang mih ki sngi da pynboon yei em ki pulit hapoh ki thaw wa haap hapoh ka Assam haka thaaiñ Kulicherra.
U Mizoram Chief Secretary u Lalnunmawia Chuaungo haka chithi wa thoh u cha u Chief Secretary ka Assam u Jishnu Barua, da ong u wa i khang ya u sarok NH 306 dang pteiñ bait i wot hadien ka yalang wa u Union Home Secretary u Ajay Kumar Bhalla ynnin tayaw uwa da kular wow pynbait noh ya ini i kaam.
U Chuaungo da kyntu u leh ya u Barua, uwa dang chimkti wot kam u Chief Secretary ka Assam yow e yei yada (Security Escort) yaki Truck kit phniang kamjooh kiwa kit tadong Gas.
Ka sorkar Mizoram da pyrchang ko wow thooh laad wow rah ya kini ki maar wa emkaam kam na Manipur wa Tripura. U Food, Civil Supplies and Consumer Affairs Minister ka Mizoram u K. Lalrinliana da ong u wa da phah ya 2 tylli ki Truck cha Manipur yow wanrah tadong LPG wa 5 tylli ki truck kit phniang.
U Director kani ka chnat u Lalhriatzuali Ralte da ong u wa deiwa yarap ka Indian Oil Corporation Ltd, da pyrchang kam ini i jooh wow wanrah phniang wa LPG na Tripura.
U Union Home Secretary u Ajay Kumar Bhalla ha i yachem u wa ki ar jylla, da kyrpaad u yaki wow kyrriah noh yaki pulit na khappood.
Ini i kajia pood da khai im biang i ha i bynta u pood ka Assam kiwa em ha Cachar wa Karimganj District, kiwa em pood wa ka Mamit wa Kolasib District ka Mizoram.
Neidaw wa khang ya u NH 306 ha Lailapur iwa em ha Cachar District, kamwa 200 tylli ki Truck kiwa thmu wow lai cha Mizoram kiwa kit mar, da sahkut ki, katwa 100 tylli ki Truck kiwa mut u lai cha Assam na Mizoram da uiñ biang ki.
Kiwa pynman ya ini i yakhih leh ym bien ki u dam, wow pynkut noh ya ini i khang sarok iwa da poi la 5 sngi katwa ka Mizoram ym kyrriah ko ya ki pulit yong ka na ki thaw ka Assam.
U Mizoram Home Minister u Lalchamliana won da ong u wa ym kyrriah yaki pulit kat wym pu man jai jai ki thaaiñ khappood.
Ini i kajia pood iwa da khai im biang nadooh u Naichiphaw da joor i hadien wa em ki yung ki dukan wa chah tympra chah thang wei da mynsoo leh boon ngut.
Neiliang u Union Home Minister u Amit Shah leh da yaklam u wa u Chief Minister ka Assam u Sarbananda Sonowal wa u Chief Minister ka Mizoram u Zoramthanga yow pynyasuk hapyrdi kini ki 2 jylla.
