Ki warep man ki u budloom yong kawon kawon ka imlang sahlang wa ka ri heiwa boonsien hi waroh kyruiñ ki cha ki wei kam heini i por wa em ka Lockdown wow yakhun pyrchah ya ka khlam u COVID-19 ki warep man ki kiwa chah ktah joor dooh.
Kani ka samoi toh ka por ya ki wow hiar cha ki hali yong ki wow thung u bet wei deiwa chimkhia yeini neiliang ka sorkar pyrdi da rai ko wow pynlait wow pynyinsur ya ki kaam wa yatoh wa ki kaam rep.
Neiliang ka sorkar jylla kamjooh leh ki bor District da pynlait ki ya ki warep wow lai ki cha ki hali yong ki wow pyndep ya ki kaam rep.
Ynne ka sngi da yoh u sakhi ya ki warep wa da sdang poi biang ki cha ki hali yong ki kam ha Pynthor Wah wa Pynthor Neiñ ka Jowai wow pooh u loor ya ki hali.
Hawa yaklam wa ki kattu katni ki warep ha kini ki pymthor da pyntip ki wa em ki kattu katni ngut ki warep (Pynthor Wah) kiwa na jngai chnong da chem chitom ki neibhah wa da chah khang ki sarok wei katwa kamtæ da haap lai ki dei kjat hadooh 4-5 kynta na ki chnong yong ki deiwa kit ya u khoo wow baam, ki wakhu, ki wait wa kiwi ki tiar rep.
Heijooh i por da ekhublei ki leh ya ka sorkar kawa da pynyinsur ya ki kyndon ka Lockdown neibynta yong ki deiwa kyntu leh wow pynlait ya ki sarok khnang wow ye ki u wanrah ya ki mar rep yong ki.
Da kyntu leh ya ki bor ka sorkar wow yarap ya ki neibhah i krehkaam ka Lockdown da ktah bha i ya ki.
Neiliang ka sorkar jylla da pynyinsur ko ya ki kyndon neibynta ki warep tangwa da booh leh ya ki kyndon wa kynthup wow jngai iwi na iwi, ymhoi wow lai næ wan kiwa na baar ka jylla wa kiwi kiwi.
Discussion about this post