Ka Mihmyntdu Community Social Welfare Association (MCSWA) ynne ka sngi da sdang ko ya ka e sikai wa tip kam ka ‘Skill Training On Home Health Aide’ namo wow yarap ya kiwa kjut wa chitom pyn ha yung hi ya kawa da kyrchaan poisa da ka Meghalaya State Skill Development Society.
Ha kani ka sngi ka ADC ka West Jaiñtia Hills, ka DD Syngai da man ko kam ka kongsan katwa ka Medical Superintendent ka Dr. Norman Tunnel Hospital, Jowai ka Dr. N. Nongpluh da man ko kam ka symbood kongsan hei emlang u waheh chnong ka Chiliangraij u Dame H Pde, ka Dr. JN Shullai ka Director ka MCSWA wa kiwi kiwi.
Ya ka yalang ha kani ka sngi da pynlai da ka Sunita Suna, Community & Dissemination Manager ka MCSWA heiwa da yoh ya ki kyntien pdiang burom na u Aris Nongkynrih uwa man u Chief Functionary ka MCSWA.
Ka Dr. JN Shullai ha kani ka sngi da khana ko ya ka parom wa da sdang ya ka MCSWA heiwa da khana ko ya ki thong krehkaam yong ka seiñ.
Da pyntip ko leh wa kani ka e sikai toh kawa le bnai wei ym emkaam wow su iwon iwon leh na kiwa chah hikai neibhah wa man ko kawi na ki kaam wow sumaar bru wow yang ya kiwa kjut kiwa em ha ki thaw sumaar kamjooh leh ha yung heiwa daw emkaam kiwa kjut yei pynsum, u e baam, u pyndih dawai, u thaw BP wa kiwi kiwi.
Waroh ki wow chah hikai ha kini ki le bnai em ki 30 ngut kiwa na kylleiñ ka Jowai wei manda pyndep ki yei chah hikai daw ye ki wow yoh kreh hei wow sumaar bru neibhah katni boonsien ki manyung em ki du uwi u khon wei em won kiwa boon wa lai beh kreh katwa kamtæ ymyoh por ki wow yang ya ki bei ki pa yong ki kiwa da tymmen da thiah kjut ha yung.
U Lambormi Suchen uwa man kam u Skill Development Officer ka MSSDS da khana u ya ki kaam ka yung krehkaam yong oo toh wow yarap u e kreh ya ki khynroo khyllood heiwa da em hadooh 78 tylli ki seiñ kiwa man kam kiwa e sikai hapoh ka MSSDS napoh West Jaiñtia Hills.
U Dame H Pde hawa e yei klam da yaroh u ya ki kaam wa da leh ka MCSWA kawa da man sakhiat i myntoi ya ki khynroo khyllood ka Ri-loom Jaiñtia.
Ka Dr. N. Nongpluh hawa e yei klam ha kani ka sngi da ong ko wa kani ka sngi u man ko ka wow sahkynmoo ya ka MCSWA.
Da ong ko wa kat dang lai ki snem i yoo ki bru ya i kjut i sam dang phær i wei kani ka e sikai man ko i kyrkhu ya ki khynroo khyllood neibhah wa ini i kaam man i iwa kordor bha neibhah daw ye u yarap ya ki bru kiwa em ha i kjut i chitom.
Chooh chooh da kyntu ko ya ki khynroo khyllood ki wow chah hikai wow chimkhia wei wow man ki kiwa minot khnang wow ye ki u chakri ya ka imlang sahlang.
Kam ka kongsan, ka DD Syngai hawa e yei klam da yaroh ko ya ka seiñ wa da sdang kreh nadooh u 1982 wei da kreh ko khlem sangeh wow chakri ya ka imlang sahlang.
Da ong ko leh wa ka lyngkor ka MCSWA toh kawa khia heiwa da chakri ko ya ki bru wa har rukom nadooh kiwa pynemkaam bakla ya u drugs, ki khynthai wa khayi yei doh i pran, wei katni won wow e sikai ya ko ya ki khynroo khyllood kiwa ym em kreh.
