Ka seiñ Jowai-Shillong-Guwahati Tourist Cab Association (JSGTCA) ha ka thong wow pynsuk pynjan yei lai i wan ki paidbah na Jowai cha Guwahti. Ha ka sngi Muchai 28 Thohlakhmi da sdang ko u wai yei kamai kari na Jowai-Guwahati wei kam ka dak i sdang yeini i kamai, ka seiñ da pynman ko ka yalang wa tbian hei pynlai u A. Pohshna, President, JSGTCA wei da emlang leh u O.R. Challam, President Seinraij Jowai kam u kongsan, u Lammat-O Laloo, Land Secretary, Seinraij Jowai, u Pailakordor Lyngkot, President AJCTTA wa ki dkhot ka seiñ.
U A. Pohshna kam u chongknor yong kani ka yalang da e u ki kyntien yahkhmat deiwa khana pynsñiaw hajrong ka thong yong kani ka sngi katwa u General Secretary, u H. Lyngdoh da e u ki kyntien pdiang burom.
U Pailakordor Lyngkot hawa klam da ong u kiwa boon ki paidbah walai wa wan chaniah ki ha ki kari kamai kamtæ i chynna jngai yong ki dkhot ka JSGTCA wow sdang ya kani ka Stand Jowai-Guwahati man i kyrkhu wakhroo ya ki paidbah kiwa dawa u lai na Jowai cha Guwahati neibynta i kaam i duk yong ki wei da kitbok kitrwiang u leh wa i thrang i angnood ki dkhot ka seiñ u man iwa jop da ka luti yong i yatylli wei yatoh yumut.
U O.R. Challam, President Seinraij Jowai kam u kongsan yong kani ka sngi, chwa wow ah yow Ribbon kam ka dak i wai ya kani ka Stand Jowai-Guwahati iwa hakhmatdooh kyrsu kyntu u ya ki bru wa yah ya kini ki kari kamai Jowai-Guwahati wow man kiwa tip u burom ya kiwa chong kari wei wow e i chakri wa khooid wa hok wei ymtoh leh u chim kabu ki palat neidor wa dabooh ka seiñ.
Chooh chooh ong u leh kamwa ka Seinraij Jowai da dep ko wow chna pynmiat pynbha ya kani ka thaw yieñ kari, chimkhia leh wow pynkhooid pynjngiar ya ka na ki por cha ki por khnang wa i mankhooid mankyntang wei miat yoosuk kani ka thaw u neh u sah i.
U President ka JSGTCA da pynrap u leh wow khanna wa ka thaw yieñ yong ki kari kamai Jowai-Guwahati u man ko waroh chisngi ha Stand Jowai-Shillong (Police Point, Newhill) katwa ha Guwahati won ka thaw yieñ yong ki u man ko ha Paltan Bazar, ASTC Complex chirrup waka Stand Tourist Shillong wei i dor bai kari u man i T. 600 samen bru.
I kamai kari u sdang i nadooh ka 01-03-22.
