Hadien wa da pynbaad da ka liang pyrchah wa em chiboon i tih mooyong pyrchah ya ka aiñ heiwa ka sorkar da len bait ko ya ini tangwa hadien wa lai hiar da u Chief Justice ka Meghalaya High Court cha ka thaaiñ Khliehriat da yoo u dei khmat ya chiboon u mooyong wa dang dep tih uwa da noh pyn harood sarok iwa da pynkhyrngiat yei wym em pynkrehkaam ya ka hukum ka NGT kamjooh ka Supreme wa da khang yei tih mooyong khlem da yoh bor katkam ka aiñ.
Neiliang ka yung bichaar High Court ha ka hukum wa da pynmih ko ha ka mukotduma wa da leh hi ko hadien wa mih khubor wei e FIR ka Nokma na South Garo Hills yei em kiwa tih mooyong pyrchah aiñ deiwa pynbaad wa da emkti lang leh ki pulit, ka yung bichaar da ong ko wa da khuslai wa ini i kaam tih mooyong da ye i wow man du deiwa emkti lang ki bru wa em hei bor.
Chooh chooh hadien wa wan na thaaiñ Khliehriat neiliang ka yung bichaar da ong ko wa iwa yoo toh du kiwa cha rood sarok wei ym tip hadooh katwon won cha ki thaw wym yoo.
Hadien ini ka sorkar jylla leh pynbna wot ko ya ki kyndon hapoh ka aiñ MMDR Act 1957 yow khang yei tih mar pohkhyndaw pyrchah ya ka aiñ deiwa pynmih ya ka Meghalaya Mining Prevention of Illegal Mining, Transport & Storage Rule 2022 ha ka 15-03-22 deiwa ong wa ini da toh u leh 20-30 snem nachwa wei yeini da leh katkam wa da phah da ka NGT.
Kamtæ hadien ini da mih chiboon i lai kem da ki sahep sorkar ya u mooyong wa da dep tih wei da dep pynhaap ha kiwa boon ki thaw.
Katkam wa pyntip ki pulit haddooh wa kut u Wisu (Mar) 2022. Ha ka 24 tarik, u EAC ka West Khasi Hills deilang wa ki pulit da lai kynreh ki ya ki paar mooyong wa em ha thaaiñ Nirang wa Miangmawdar wei da chem ki 2012.47 MT u mooyong wa da tih pyrchah ya ka aiñ wei da kem noh ya uni u mooyong.
Ha ka 29 tarik ha South Garo Hills, u Deputy Commissioner deilang wa ki pulit da lai ki cha ka thaaiñ Chokpot heiwa da chem ya 70 tylli ki thaw pynhaap mooyong wym em wa kamtre heiwa da kem noh ya uni u mooyong.
Ha ka 30 tarik ki heh sorkar wa ki pulit da kem ki ya 5 tylli ki thaw pynhaap mooyong wa man pyrchah ya ka aiñ wa em ha 2 Kilo ha u sarok wa lai cha Sutnga, EJH.
Ha ka 25 tarik ki pulit deilang wa ki sahep sorkar da lai kem ki ya u mooyong wa da noh ha rood sarok Rymbai, 1 Kilo, 2 Kilo, 3 Kilo wa 4 Kilo ha East Jaiñtia Hills.
Ha ka 25 tarik biang, ki pulit da kem ki ya u mooyong wa da noh harood sarokbah NH-06 ha Byndihati.
Ha ka jooh biang ka sngi da kem ya u mooyong wa da tih pyrchah ya ka aiñ uwa da pynhaap ha 3 Kilo, 4 Kilo ha u sarok wa lai cha Sutnga.
Ha ka 23 tarik won, u ADC ka, East Jaintia Hills deilang wa ki Magistrate kamjooh ki pulit da lai pait ki ya ka thaw pynhaap mooyong wei da chem wa em 12 tylli ki thaw wa da pynhaap ya u mooyong ha Rymbai Road.
Puræ leh: Khyrngiat ka High Court wow yoo chiboon i tih mooyong pyrchah aiñ ha thaaiñ Khliehriat
