Jowai : Ka tnat District Rural Development Agency (DRDA) lyngba ka yungkrehkaam u BDO Thadlaskeiñ C&RD Block hei yakrehlang waka Meghalaya Basin Development Agency (MBDA) wa ka Village Employment Council (VEC) ka chnong Ialong da sdang ki u kreh yaka yingkieñ lai kjat hajrong ka wah Myntdu, Pynthor Ialong heibynta ka Dieñ Yirngam.
Da antad u pynlut hadooh palat chi klur tyngka neibynta wow chna ya kani ka yingkieñ lai kjat ha itai i thaw. Itai i lut kynthup ko yaka yingkieñ kawa kynjoh T. 65 lak wei kynroh ya ki rood wah heini i thaw wa kynjoh kamwa T. 37.50 lak.
Ya kani ka poisa u pynlut lyngba ka MGNREGS hadooh T. 70.81 lak, na ka MBDA hadooh T. 25.62 lak wei naka chnong Ialong hadooh T. 6 lak tam.
Kani ka yingkieñ lai kjat jrong ko kamwa 80m wei u kmai ka luti lai kjat kamwa 1.5 metre katkam wa khana ka kong C. Bamon kawa man kam ka Engineer ka DRDA.
Kani ka yingkieñ u yarap ko chiboon ya kiwa rep wa ya kiwa uiñke sawari kiwa wan cheini i thaw yow kaap ki cha chilliang ka wah.
Ynnin u Project Director ka DRDA u ma DM Wahlang ryngkat waka Engineer, ki sahep na Block Office da hiar ki cha kani ka yow pait wa i kreh man i iwa lai chaaid chaaid.
Discussion about this post