Jowai : Ka Seiñ Khynroo Khyllood Committee Ka Seinraij Jowai kam wow kynmoo tympang ya ka sngi yap wa 153 yong u Woh Kiang Nangbah, khlawait ka Ri-Loom Jaiñtia, ynne ka sngi 27 tarik da sdang ki ya ki prokram yalehke pyn ka-it kasar ki wa daw pynkut ha ka 29 tarik uni u bnai.
Ynne ka sngi da yoh u sakhi ha Madan Ryngkaw, Tpep-pale ya ki ar jait ki yalehke kitæ toh ka Dat Moo Niaw wa ka Tan Ïyrmai.
Ha waroh ar ki yalehke da e lad ya ki dong ka Jowai kamjooh na palat chnong wow yachim bynta ki. Ki khynroo, khyllood dei chongchit da pynyoo ki yei sap yong ki khamtam ha ka yalehke Dat Moo Niaw. Da yabhah ya ki dong wa chimbynta chynrang wa kynthai heiwa nei liang ki chynrang yei naam jop ha ka Dat Moo Niaw da yoh ka Tuber wa ar da ka Tpep-pale. Nei liang ki kynthai da jop ka Panaliar katwa yei naam wa ar da yoh ka Tuber.
Ha ka yakoop Tan Ïyrmai neiliang ki chynrang da jop ka Tuber pynbood ka Umchangiar hei wa ar. Ha ka yakoop yong ki kyhnthai won da jop ka Tuber katwa yei wa ar da yoh ka Panaliar.
Ki prokram ki wa daw pynman ha kini ki sngi wa daw wan man ki kamni næ:
28-12-15: Rah Mookhrah hei por 10 waje i step, hei por 12:30 pyrdi sngi pynbood sa ka Slow Bicycle Race ya ki khynnah wa 8 snem hadooh 15 snem i rta, hei jooh por leh u em wa ka Kynthih Chyiap Pyllah (Broad Jump). Waroh ini u man i ha Madan Ryngkaw Tpep-pale.
29-12-15: Heipor 9:30 i step daw i yakop Yasiat Khnam pynbood won sa ka Slow Racing Bike ha i por 11:30 i step. Ya kini ki artylli ki yakop daw pynman ha Madan Madiah Kmai Blai.
Discussion about this post