Jowai: Ka dorbar chnong Loomkyrwiang, Jowai ynne ka sngi da sdang ko yei lehkmen dap 100 snem ka yungwalieh wada seiñ nadooh u snem 1920, hajrong ka yurim wow yoh ki khon ka chnong u yachemlang lyngba ki lehkmen waphær waphær nalor wow pyndep yaka Bam Phalar wa chisien chisnem wa kiwi won ki kam chnong kaam thaw.
Hawa sdang kani ka yungwalieh toh kawa dei yung trep donhi wei da sdang chna daka khyndaw-bilat wa thymme nadooh u snem 2010, heiwa da ye u pyndep wei da wai won yaka haka 10-02-2017 hei lut wa T. 57,06,953 lyngba i yarap kiwa mihkhmat nadooh ki MP, MLA, MDC, ki chnat sorkar waphær waphær nalor i e sñiwbha ki paaid ka chnong wa kiwi.
Neiliang u Building Secretary u C. Najiar hawa klam pynche hajrong i lai luti kani ka yungwalieh, kamjooh hadooh i lai luti wow chna yaka yung thymme, da pynsñiaw u yei kmen neibhah wa de ye u pyndep chwa wow dap ko 100 snem.
“Nalor wa ka yungwalieh man ko ka thaw yachemlang neibynta iwon iwon i lehkmen, yooluti O wow pynmyntoi haroh ko yaki khon ka chnong ka thaw ha kiwa boon ki liang, heiwa u man ko ka thaw wow yohlaad ki u pynpliah næ u kyntu kynrong yei sap i phong katkam wa yah ka juk,” ong u Andrew Shullai, Local MDC hawa e yei klam kam u symbood kongsan.
Neiliang u kongsan, u Sanbor Shullai u MLA ka Shillong South, ong u wym toh u mylliñ ya waroh kiwa embynta wow yarap, wei yawa sah haka pateiñ katni won toh yow nangpynbha chooh chooh yeiwa da yoo jngai kiwa heh nachwa haki spah snem wada lai neibynta kani ka yungwalieh.
Da ong haroh u wa haki por yongrim pathan wym pu toh ka juk stad sayan, tangwa dei chlur mynsiem wei kreh chitom yong ki da ye ki wow pynyieñ yaka yungwalieh kawa man kawi nei jop wa khroo.
Kamtæ kyntu u wow em i ya krehlang, i yatylli wei ya sñiawthooh yumut khnang wow pynkhlan chooh chooh yei emkaam.
Kiwi won wa klam kynthup ya u Hamewan Laloo waheh chnong Loomkyrwiang, ka Barmon Laloo wa kiwi kiwi.
Discussion about this post