Jowai: Ka Jowai District Presbyterian School ynne ka sngi da sdang ko ya ka yakehkmen dap 25 snem namo ka Silver Jubilee kani ka skur ha ka yalang wa pynman ha pchem kani ka skur wa em ha Ialong, WJH.
Ka Principal ka School ka R. Bamon hawa khana ko ya i parom ka skur da pyntip ko wa da seiñ ya kani ka skur ha u snem 1994 deiwa chong wai ha i yung yong ka T. Khonglah ha Chutwakhu wei da sdang chwa ya ka skur du da ka Class Nursery wei da em le ngut kiwa sikai kiwa kreh mon sñiawbha kitæ u (L) E.R. Tariang (Retd. Inspector of School) kam u Principal, ka C. Lyngdoh (Rtd. Headmistress, Govt. High School) wa ka (L) Yoorida Paslein wei da em 37 ngut ki khynnah.
Da e pyrtuid ya ka skur ya kani ka ksur kam ka Jowai District Presbyterian English School wei da bood ya i hikai katkam wa leh ka ICSE. Ha ka 19-03-94 da wan wai ya ka da u Vice Chancellor ka NEHU u (L) Dr. B. Pakem.
Ya kani ka skur da pynlai da ka Education Committee kawa thung da ka Jowai Presbyterian District heiwa u (L) E.R. Tariang man u kam u Chairman wa u BG Ladia da man u kam u Secretary.
Ha u snem 1997 da chna ya u chap ka skur wei da booh ya i ktien “Fly High” kam i ktien im sngi.
Ha u snem 1999 ka Jowai Presbyterian District deiwa bood ya ka rukom pynlai ka Synod katkam ka “The Constitution of the KJP Synod Education Board and Orders Rules, 1991.” Ka District da thung ko ya ka Managing Committee wow pait ya ka skur wei ki dkhot u neh ki le snem lait noh ki bei ki pa ki khynnah skur kiwa yoh u man dkhot chisnem wei kani ka Committee em ko hapoh i pait ka Education Committee.
Katwa dang lai ki snem ka skur dang ku ko wei ha u snem 2000 da wai ya ka Class V kawa man wa da sdang ka kyrdan Upper Primary wei ya kani ka kyrdan da pynbood da ka Syllabus ka MBOSE wei da kylla pyrtuid ya ka skur cha ka Jowai District Presbyterian School.
Ha u snem 2005 da wai ya ka Class X tangwa neidaw wa duna ware ki khynnah da pyndooh noh ya yaka kyrdan Secondary. Ha u jooh u snem da chimkti ya ka Upper Primary Level da ka SSA wei da yoh myntoi naka sorkar heiwa da su tulop ya soo ngut kiwa sikai, Mid-Day Meal, School Grant, Kitchen Grant wa kiwi kiwi.
Ha u snem 2012 da yoh ya ka thaw wa 30,000 Sq.Ft. wa em ha Ialong lyngba ka Fund Raising Sub-Committee kawa em kani ka skur katni wei ha u jooh u snem da yoh T. 20,02,500 wow chna ya ka yung skur lyngba ka SSA Scheme kawa wai ha u 2016 wei da kyrriah ya waroh ki khynnah cha kani ka yung skur wa thymme.
U T.Bn A. Laloo uwa man kam u Founder Member wow sdang ya kani ka skur da kynmoo u wa ar sien da chah kyntait wow sdang ya kani ka skur tangwa ha ka sien wa le da pdiang wow sdang ya kani ka skur hadien wa ki paidbah mynjur ki wow yarap poisa yow pynlai ya kani ka skur wei hadooh katni ki jooh ki bru dang pteiñ ki wow yarap poisa wei da kyntu u leh ya kiwi yow leh ki kamjooh.
U kongsan ha kani ka sngi u L.S. Pohkshang, Moderator KJP Synod Mihngi da ong u wa sñiaw suk u wow yoo wa kani ka skur da “Fly High” ko katkam i ktien im sngi kani ka skur wei da baan joor u yei emkaam u em i sñiaw yajan kiwa sikai wa ki khynnah skur yow maya ki khynnah u lai skur deiwa e nongmuna wa ki khon u dei yaam ki lada dooh ki u lai skur ym toh de kamwa nachwa ki por.
Discussion about this post