Ka seiñ Jaiñtia Students Union (JSU) kawa man kawi na ki seiñ wa kreh monsñiawbha yong ka Ri-loom Jaiñtia ynne ka sngi da sdang ko ya i lehkmen dap sanphaw snem ka seiñ ha District Library Auditorium, Jowai heiwa u Garland Rymbai, President warim ka seiñ da man u kam u kongsan katwa u MLA ka Mowkaiaw, u Nujorki Sungoh won kam u symbood kongsan.
Ya kani ka yalang da pynlai da u Rikut Pareiñ uwa man leh kam u President warim ka seiñ.
U Nujorki hawa e yei klam da ong u wa ka seiñ JSU man ko kawi na ki seiñ kawa chaniah ki paidbah ka Ri-loom Jaiñtia deiwa kyruiñ cha ka ha kiwa boon ki kaam.
Da ong u wa ki kaam wa da leh ka seiñ ha ki sanphaw snem ymtoh kiwa neibynta ki bru samen tangwa neibynta ka jaitbru hi waroh kawi deiwa kdaw ya ka MBOSE Cell, ka Blood Blank wa kiwi kiwi.
Chooh chooh da ong u wa ka Ri Jaiñtia em ko ka bynta wa khroo dooh wow kyntu kynrong ya i yoh i laa ka jylla neibhah wa da man ko ka thaw kawa da kyrkhu kawa mahajon la ha iwon iwon i liang.
Heiyatoh wa i jhep da chem wa ki paidbah ym em u krehlang ki wei da man iwa sarom wot wow ong wa ka Jowai toh ka District Headquarter ka West Jaiñtia Hills neibhah wa dap i jhep ha kylleiñ. Kamtæ da kyntu u ya waroh kiwa chong chnong ka Ri-Jaiñtia wow man kiwa krehlang khnang wow pynbait noh ya ini i kaam.
Da ong u wa ka Block-I man ko ka hok kynti yong ki Jaiñtia heiwa kiwa chong chnong ha kani ka thaw kwah bha ki wow wan biang chapoh Ri Jaiñtia.
Kam u kongsang ha kani ka sngi, u Garland Lyngdoh da khana u wa ka JSU da sdang ya ka ha u 1972, heiwa da khana u ya ki kaam wa da leh ka seiñ.
Da khana u ka phang wa kongsan bha ha ki snem 1987 toh u pood ka jylla wa ka ILP.
Chooh chooh da ong u wa ka seiñ ki khynnah toh u man ko ka seiñ kawa pait wa kdoh ya i rukom krehkaam ka sorkar wei emkaam leh wow ban ya ka sorkar hajrong i emkaam ka jaitbru.
Da e u leh ya ki kyntien sneiñ kyntu ya ki dkhot ka seiñ heiwa da ong u wa chwa wow leh iwon iwon emkaam toh kiwa da ngam yillu hajrong katæ ka phang chwa wow leh iwon iwon. Da kyntu u leh wa emkaam wow man leh ki bru kiwa stat wa kiwa chemphang wa kiwa syndong ha kiwon kiwon ki bynta khamtam hawa kreh hapoh ka seiñ.
Kiwi kiwa klam ha kani ka sngi kynthup ki ya u MDC ka Jowai Central, u Andrew Shullai, u Sambormi Lyngdoh, President ka EJNC, u D. Khongsit, General Secretary ka FKJGP wa kiwi kiwi.
Kiwa klam da e khublei wei da kitbok ki ya ka seiñ wow pteiñ ki ya ki kaam yong ka heiyatoh wa i bha i miat ka ri wa ka jaitbru waroh kawi.
Ya ki kyntien khublei da yoh na u Dapmain Suchiang uwa man kam u Publicity Secretary ka seiñ.
Ya kani ka sngi da pynphooh da ki chaad wa ki rwai wa da pynkhreh da ki khynroo khyllood na kylleiñ ka Ri-loom Jaiñtia.
