Ka yung krehkaam u Chief Electoral Officer, Meghalaya, Shillong ynne ka sngi da pynman ko ya ka yalang ka jylla yow sdang u pynthymme ya ka Electoral Roll namo ka Special Summary Revision of Photo Electoral deiwa booh ya ka 01-01-2022 kam ka Qualifying Date namo ka tarik wa khaddooh kiwa daw dap 18 snem yow yoh u man kam kiwa thap Vote.
Ya kani ka yalang da pynman ha ka Auditorium, Meghalaya Bharat Scouts & Guides, Shillong heiwa u Meghalaya Chief Electoral Officer, u F R Kharkongor da wan u kam u kongsan.
Neiliang u Kharkongor da yaroh u ya ka yung krehkaam ka Deputy Commissioner, East Khasi Hills yei ki u pynkrehkaam ryntih ya ki ar tylli ki Election chiteiñ samoi kiwa dang pyndep hapoh ki artylli ki Constituency wa em hapoh ka District.
Da ong u leh wa kani ka Special Summary Revision toh kawa emkaam bha neidaw ka Election da jan bha ko, kamtæ emkaam wa waroh kiwa toh hok wow yoh Vote wow wan ki chakhmat yow yoh yei hok yong ki wow chimbynta ha ka synchaar paidbah. Da pyntip u leh wa ha kini ki por wa em ka khlam i pynman Election da wanrah ko ya iwa boon iwa eh tangwa deiwa ya krehlang da waroh da ye wow jop ya waroh iwa eh yow poi cha ka thong wa booh da ka ECI.
Chooh chooh da kyntu u ya ki paidbah wow chim kabu ya i stat ka juk wa katni (Technology) wa e yarap ya kiwa thap Vote kam ka Voter Helpline App kawa ye u yoh na Google Playstore, heiwa ye ki wow tip ya waroh iwa emkaam ki wow tip chaphang ka Election.
Ha kani ka sngi, u kongsan da pynlait u leh ya ka Special Summary Revision 2022 Creatives, ki Video wei da saam u leh ya ki Integrated Draft Photo Electoral Rolls CD cha ki seiñ saiñhima wa kamjooh ya ki BLO Kit cha ki Booth Level Officers.
Kiwi kiwa da emlang toh ka I Laloo, DC East Khasi Hills District, ki Additional CEO, u B Mawlong wa A M Sangma najrong kiwi de.
