Ki wakreh ka Mawmluh Cherra Cement Limited (MCCL) hapoh ka lama yong ka MCCL Employees Union ynne ka sngi da sdang ki yei yakhih deiwa chah thngan hakhmat ka yung krehkaam kani ka karkhana sorkar ha Shillong.
Ki wakreh kani ka karkhana hapoh ka MCCLEU da sdang yakhih ki nadooh ka 19 u Khonchonglad wow pyrchah yei wym mano ka sorkar yei dawa wow su ya ka Arear kawa da sahteiñ nadooh u snem 2013 wa ka tulop kawa hadooh 16 bnai.
Ha ini i yakhih, neiliang ka yung krehkaqm ka Deputy Commissioner ka East Khasi Hills District da elaad ko wow em du kamwa 20 ngut kiwa yakhih ha i jooh i por, wei emkaam wow paan ki man ka sngi katwa dang pteiñ ki yei chah thngan neidaw wa em ki kyndon wow yada na ka khlam COVID-19.
U S. Lyngdoh uwa man leh u President ka Union da ong u wa i mih i eh i khoo ki wakreh kani ka karkhana pynmih khyndaw-bilat toh neidaw wym pynman ya ki kreh ha kani ka karkhana heiwa da kyntu leh ya ka sorkar wa ki bor wa pait ya ka karkhana wow leh yeiwa emkaam.
Da ong u wa i su ya ka tulop wa da dawa toh neibynta ki 16 bnai wa uni u bnai, wa kynthup ya 5 bnai nadooh u Khonchonglad (Nov) 2015 hadooh u Wisu (March) 2016, i su ya ki wakreh palat por iwa da sahteiñ nadooh u snem 2013 hadooh katni, wei iwi i dawa toh neibynta i pynlut heipor wa kjut wei chitom ki wa kiwi ki myntoi wow yoh ki.
