Ynne ka sngi ka Joint Action Committee (JAC) kawa man ka satri ki seiñ wa kynthup ya ka Jaiñtia Hills Truck Owner Association, Jaiñtia Hills Clinkers and Cement Association wa ka Meghalaya Truckers Union da sdang ko ya i yakhih wa jai-jai yong ka.
Kani ka yakhih kawa khlem kut por namo ka Indefinite Strike toh hajrong i wym pynkrehkaam ki karkhana pynmih khyndaw-bilat (Cement Factories) ya i dor wa da booh da ka chnat Transport Department ka sorkar jylla.
Kam wow pynkynmoo heini ka sorkar da pynmih ko ya ka hukum ha ka 25 Naikhynde (September) 2020 lyngba ka Notification NO.TPT.91/80/813 heiwa da pynthymme ya i dor bai kit mar ki truck itæ T.7 hadooh T.11 chi kilometre chi ton ha ki sarok psiang, T.8 hadooh T. 12 chi ton chi kilometre ha ki sarok moo wei T. 10 hadooh T. 12 chi ton chi kilometre ha ki sarok khyndaw wei hajrong ini, neiliang u Deputy Commissioner ka East Jañtia Hills District ha ka 25 Naichiphaw da phah u ya ki karkhana wow pynkrehkaam noh ya i dor wa da booh ka sorkar.
Ynne ka sngi won ka JAC sdang ko yei yakhih deiwa khang pyrchah ya ki karkhana wow phah kit (load) ya i khyndaw-bilat wa Clinker kat wympu sdang su noh yei dor wa thymme.
Ini i yakhih da sdang i na Chohchrieh, East Jaiñtia Hills heiwa ki dkhot ka JAC da pynuiñ ki ya ki phaw tylli ki truck wa kit ya kini ki mar na ki karkhana khyndaw-bilat wa em hapoh ka District.
