Jowai: Ka Moosyiem Cultural & Sports Club ynne ka sngi da pynman biang ko ya ka lympung yalehke Football wa tip kam ka 15th Invitation Gold Cup Football Tournament, ha Madan Hula Football Playground.
Chwa wow sdang kani ka lympung da em ka yalang wa tbian wa pyllai da u L. Suchiang uwa man leh kam u Waheh Chnong ka Moosyiem heiwa u president ka FKJGP-Jaiñtia Hills, u T. Lytep da man u kam u kongsan.
U Chanky Langbang uwa jooh man kam u Secretary warim kani ka Club uwa man leh kam u Acting Dolloi ka Elaka Shangpung da ong u wa i thmu yong kani ka lympung toh wow tipmit ya kiwa em i sap ha kani ka yalehke wei wow kyntu kynrong ya ki khynroo ka thaiñ.
Kam u kongsan ha kani ka sngi, u Lytep da e nongmuna u ya u Eugeneson Lyngdoh wa ya u Aiborlang Khongjee kiwa na kani ka jylla kiwa da imja na kani ka yalehke wei da rah burom ki ya ka jylla kamjooh da mihkhmat ki leh ya ka ri India.
Da khana u leh wa ka seiñ da jooh yaklam ko wa ki montri sorkar hei yatoh wa emkaam wow chna ya ka Policy wa kyrpang neibynta ki kaam yalehke namo ka Sports Policy khnang wow ye u yarap ya ki khynroo khyllood kiwa em i sap, kamjooh leh wow esikai pynpliah ya ki. Heijooh i por da kyntu u ya kiwa yalehke wow man ki kiwa minot wa kiwa ye u yaichah neibhah khlem i mynsien yaichah ym ye u poi cha ka thong deiwa suk.
Ha kani ka sngi ka yalehke wa nyngkong yong kani ka lympung da man ko hapyrdi ka Raliang S.P.S.C pyrchah ya ka Coira SC heiwa ka Raliang S.P.S.C da jop ko da 3-1.
Ya ki kool ka Raliang da thap da u Iaichah Dkhar ha ka minit wa 71 wa ki ar kool na u E. Lyngdoh ha ki minit wa 5 wa 80 katwa ya ka kool ka Coira SC da thap da u Sam Wanmi Langstang ha ka minit wa 63.
Ka yalehke wa ar won daw pynman ha ka 29 tarik uni u bnai hapyrdi ka Maitchaphrang SC pyrchah ya ka Para-Ace-United.
Hadooh ynne da wan hadooh 22 tylli ki dhab wa yachimbynta ha kani ka lympung.
Discussion about this post