Ka 29th State Karate Championship 2023, wa pynman da ka All Meghalaya Karate-Do Association (AMKA), da sdang yaka ynne ha Indoor Stadium ka Jawaharlal Nehru Sports Complex.
Kani ka lympung wa ar sngi toh kawa pynman da ka Directorate of Sports and Youth Affairs ka sorkar Meghalaya wei da wan chimbynta 372 ngut ki Karateka kiwa em 10 snem chapoh wa kiwa man kam ki Senior kiwa da wan na kylleiñ ka jylla.
U kongsan ha kani ka sngi toh u Ransom Sutnga, Co-Chairman ka Meghalaya Industrial Development Corporation Ltd uwa man leh kam u President ka Mawkhar Sports Club.
Hawa e yei klam da yaroh u yaka AMKA kawa da pynman ya ki lympung wa bha wa miat wei nadooh u snem 1981, ka AMKA da pynmih ko 200 ngut kiwa da yoh takma hapoh ka ri wa 20 ngut won cha baar ka ri wei da yooluti u wa daw mih chooh chooh ki ha ki snem wow wan.
Neiliang won u symbood kongsan, u Meghalaya State Olympic Association Working President, u John F Kharshiing da e khublei u yaka AMKA kawa da pynman ya kani ka Championship deiwa kdaw wa ka Karate toh kawi na ki jait yalehke wa ka-it bha ki bru hapoh ka jylla.
Kamtæ da e khublei u ya ki bei ki pa wa kyrchaan ki ya ki khon yong ki ha kani ka yalehke kamjooh ha kiwi de ki jait yalehke wei da pynchlur u leh ya ki wow puræ ki yaka Meghalaya Sports Policy yow tip ki kammon yoh myntoi ki. Da pynchlur u leh ya ki Club wa kiwi ki chlem e sikai wow yaleh ki yow yoh Grant hapoh ka YESS Meghalaya Scheme.
Kani ka Tournament man ko leh chi bnai chwa wow sdang ka 5th Meghalaya Games kawa daw pynman ha Tura wei da man ko ka laad ka kabu wow pynkhreh ki. U Kharshiing da ong u wa ka Meghalaya Games man ko leh kam ka laad wow pynkhreh yaka National Games kawa daw pynman hapoh ka jylla ha ki snem wow wan.
Ha kani ka Championship daw pynman ya ki Kumite (Sparring) wa ka yaleh Kata (Demonstration of Form) neibynta yong samen wa dei yong lok kiwa da yabhah dei rta wa i khia.
Ha ka sien wa khaddooh wa pynman ya kani, ka Sports Authority of India, Shillong da man ko kawa jop neibynta ki chynrang katwa kiwa yalehke ka AMKA won da jop ki ya ka yong ki kynthai.
Discussion about this post