Jowai: Ka lympung yalehke Badminton kawa tip kam ka 2nd Open To All Badminton Tournament wa pynman da ka Dorbar Chnong Dulong hei krehlang wa ka Dulong Badminton Association da sdang ko ynnin i janmiet ha Dulong Multipurpose Hall, heiwa da wan wai ya ka da u S.C. Laloo, ADC, West Jaiñtia Hills District hei emlang u Dolloi ka Elaka Jowai, u Puramon Kynjiñ wa kiwi kiwi ha ka yalang wa pynlai da u Snarmon Lato.
U Waheh Chnong ka Dulong u Sienwonmiki Bareh da e u ya ki kyntien pdiang burom wei da khana u wa i thmu wa pynman ya kani ka lympung toh chibynta wow wailad ya kiwa emsap ha kani ka yalehke wow wan ki chakhmat wei wow pynlait leh ya ki khynnah na ki kaam wa sih wa boonjait katni.
Neiliang u S.C. Laloo da yaroh u ya ka chnong Dulong wa da pynman ko kam kani ka lympung yalehke Sport khamtam wa ki khynroo khyllood u lait ki na kiwa boon ki kaam wa sih wei da e mynsien u leh ya ki wow ku ki chaphrang.
Da yooluti u leh wa ka chnong daw sai ko ym du ya kiwa stat tangwa ha kiwa boon ki rukom lada ha ka Sport namo ki kaam waphær waphær wow pynyoo cha ka pyrthai.
Ha kani ka lympung da bhah ha ki 7 kyrdan wa kynthup ka Open To All namo ya ka Men Single wa Double, 45 snem chajrong ya Men Single wa Double, ka Mix Double Open to All, ka Under -15 Boys Single wa Double.
Haka lympung yakhun yong kani ka sngi sdang haka Under 15 Boys da jop da u Owawan Dkhar ya u Wanjur Niang, katwa haka Open to All Men Single’s won kiwa jop kynthup ki ya u Dr. Peter Lamare, u Gregoreo Passah, u Mebanker Shullai, u Ritre oo Nongpluh, u Deilang Nongpluh, u Armanroy Bamon, u Wompher Laloo wa u Rimilan Passah.
Discussion about this post