Hajrong ka thong wow e sikai ya ki khynnah wa kiwa sikai chaphang ki rukom waphær yong ka Scouts-Guides Movement, ki bor pait bor pynlai ka Bharat Scouts & Guides, East Jaiñtia Hills District nadooh ynne ka sngi hadooh ka 18 tarik uni u bnai daw pynman ki ya ka 4th Winter Annual Camp & Unit Leaders Training ha Sarasvasti Vidya Mandir, Kongong East Jaiñtia Hills heiwa ki khynnah Scouts-Guides deilang wa kiwa sikai da wan ki wow ya chimbynta.
Ha ka yalang yahkhmat yong i sdang ya kani ka 4th Winter Annual Camp & Unit Leaders Training hei pynlai u E. Shangpliang, District Secretary MBS&G East Jaiñtia Hills da wan wow emlang leh da u L. Lyngdoh, DSEO East Jaiñtia Hills Khliehriat kam u kongsan chirup wa ka P. Dkhar, SDSEO, East Jaiñtia Hills District.
U L. Lyngdoh hawa e kyntien kam u kongsan da e mynsien u deiwa ong kamwa ka thong krehkaam yong ka Scouts-Guides Movement toh wow leh yeiwon iwon i kaam wa miat wa bha i wow man i myntoi ya ka imlang sahlang kamtæ toh u man kiwa chimkhia u wanrah yei khooid i jngiar wei wow chim leh ki laad ki luti wow pynsñiawthooh ya kiwi kiwa chong chnong chaphang i emkaam wow lehkhooid wei wow sumaar sukhær ya ka rymaw wa ki soodong sookun khnang yow lait ki bru wa chong chnong u maad u takhooh yei tynjooh wakhroo hadien habood.
Chooh chooh ha kani ka sngi da wan leh wow embyntalang hei e sikai ya ki khynnah wa kiwa sikai da ki bru ka Meghalaya Bharat Scouts & Guides, State Headquarter Shillong wa kynthup ya u W. Lyngdoh, State Secretary MBS&G, State Headquarter Shillong wa u Adiam U Bthuh, Scouts Master.
